Ena ika7 ni Seviteba, 2019 e sevutaki na New World Translation of the Holy Scriptures ena vosa vakaCzech kei na vosa vakaSlovak. E sevutaka na iVolatabu qori o Brother Stephen Lett, e lewe ni iLawalawa Dauvakatulewa, ena dua na soqo lavotaki e vakayacori e Ostrava, e Czech Republic. E kaburaki tale ga na porokaramu qori ena sivia na 200 na vanua e Czech kei Slovakia. Era tiko kina e le 25,284.

E sivia e va na yabaki nodra cakacaka vata na timi ni vakadewa me vakadewataki kina na iVolatabu qori. E rawarawa sara na kena wiliki na ivakadewa qo. E kaya e dua na lewe ni timi ni vakadewa ena vosa vakaSlovak: “Levu era na taleitaka, ra marautaka tale ga na wilika. Na kena kilai rawarawa qai taladrodro na vosa e vakayagataki kina, o koya e wilika ena via wiliwili tu ga.”

Ena yaga vakalevu na iVolatabu qori vei ira na sivia na le 15,000 na iVakadinadina i Jiova e Czech Republic, kei ira tale ga e sivia na le 11,000 na iVakadinadina i Jiova e Slovakia. E kaya e dua na lewe ni timi ni vakadewa ena vosa vakaCzech: “E vakavotuya vinaka na iVolatabu qori na vakasama e tiko ena vosa e volai taumada kina. E vakayagataka tale ga na yatuvosa lekaleka, kei na vosa ena gauna qo. Ena rawarawa nodra kila o ira sa dede ena dina kei ira na ka vou.”

Sa vakadewataki taucoko se vakatikina na New World Translation of the Holy Scriptures ena 184 na vosa, wili kina e 29 na ilavelave vakavoutaki ena itabataba ni 2013. E qaqa ni neitou masu na iVolatabu qori ena vukei ira na dauwiliwili mera taleitaka vakalevu na ka dina.—Luke 24:32.