Ena ika10 ina 26 ni Me 2024, e caka na sotasota ni qito hockey e vakatokai na International Ice Hockey Federation,e Czech Republic. E caka na qito ena siti o Ostrava kei Prague qai voleka ni le 800,000 na lewenivanua era gole kina. Era mani tuvanaka na tacida me caka na vunau ena qiqi ena taudaku ni raraniqito. Qo eso na irogo veivakayaloqaqataki.

Rua na cauravou rau gole yani ena qiqi ni vunau qai tarogi rau na tacida se o cei o rau kei na cava rau cakava tiko. Rau mani vakamacalataka na tacida na noda cakacaka na iVakadinadina i Jiova kei na iwalewale ni caka vulivolatabu. E vataroga sara e dua vei rau na cauravou na gauna kei na vanua e caka kina na vulivolatabu. E rau vakamacalataka na tacida ni vakayacori na vuli ena gauna kei na vanua e veiganiti vua. E mani vakadonuya me vulica na iVolatabu.

Ena dua tale na siga ratou veitalanoa e tolu na turaga kei rau na tacida, ratou kurabui ni ratou sa qai kila nira sega ni saumi na iVakadinadina i Jiova ena nodra cakacaka vakavunau. E kaya e dua vei ratou na turaga qori: “Ke oni sega ni saumi e yaga vakacava vei kemuni na cakacaka qori?” E rau mani vakamacalataka na tacida na sala e vakavinakataka kina na nodrau ivakarau ni bula na iVolatabu kei na inuinui e rawati kina. E dua vei iratou e qoroya nodrau ivakamacala na tacida, e kaya ni via kila eso tale na ka qai vinakata me dua na nona brochure Marau me Tawamudu!

Dua tale na turaga sa dau tavali vakavica ena qiqi. Oti e tarogi rau sara na tacida: “Na cava na duidui ni ka drau vakabauta kei na e vakavulica na noqu lotu?” Rau vakayagataka na tacida na iVolatabu me rau vakamacalataka kina vakalekaleka na noda. E vakarorogo vinaka na turaga qori qai vakavinavinakataka na matata ni nodrau ivakamacala.Rau vakaraitaka talega na tacida e so na ulutaga ena jw org, kei na sala me vakayagataka kina me rawa ni kila e levu tale na ka me baleta na iVolatabu kei na kena ivakavuvuli.

Eda vakavinavinakataki ira na tacida e Czech Republic ena nodra gumatua ni tukuna vei ira na lewenivanua na “itukutuku vinaka ni ka vinaka.”​—Roma 10:15.