Levu na tacida ena vica na vanua ena Democratic Republic of the Congo kei Republic of the Congo, era vosota tiko na tete ni matedewa na coronavirus, na vakacaca ni waluvu kei na batikadi. E qarava tiko na cakacaka vakavunau ena rua na vanua qori na valenivolavola ni tabana e Congo (Kinshasa), sa tuvanaka tale ga nodra vukei vakayago, vakayalo na mataveitacini. Ena gauna qo sa tiko e 57 na Komiti ni Vakacoko (DRC) me vukei ira na tacida ena yalava e qarava na valenivolavola ni tabana. Sa ra vukei e sivia ni 90,000 na tacida.

Ena ika16 kei na ika17 ni Epereli 2020, e yaco na waluvu ena tokalau ni Democratic Republic of the Congo, era toki kina e 139 na tacida. Era vakaicili na tacida qori ena nodra vale eso na mataveitacini. E saga tiko na DRC e qarava na yalava qori me tara nodra vale, se mera lai tu vakawawa ena dua na vanua na tacida era vakaleqai.

Dua na ka nodra lomasoli na tacida mera cau ena cakacaka ni vakacoko. Ena dua na vanua era kumuna na tacida, e 700 na kilokaramu na jaina, 400 na kilokaramu na sila, kei na 220 na kilokaramu na tavioka kei na drauna.

Ena dua na ivavakoso era tiko kina e 60 na dautukutuku, era qai vakaicilitaki ira na le 50 na tacida era dro yani ena ivalu. Era wasea na dautukutuku na kakana lailai mada ga e tu vei ira me yacova ni yaco yani na veivuke ni vakacoko.

Qo na ka e kaya e dua na ulunivuvale ena siti o Brazzaville na koroturaga e Congo: “Ena rawa ni veisau vakasauri na ituvaki. Au a cakacaka saumi tu, a cakacaka tale tu ga vagauna o watiqu, me vukei keitou ena neitou bula ni veisiga. Ni tete na matedewa na COVID-19, keirau vakacegui ruarua ena cakacaka. Ia keirau nuitaki Jiova tiko ga. Na gauna sara ga keirau veivosakitaka kina na ka me caka ni sa na sega na keitou, e qai vukei keitou o Jiova.”

Qori tale ga na ka e sotava e dua na tacida e yada o Sister Mbuyi Ester, ena dua na koro e Kinshasa. E kaya: “A mate o watiqu ena dua na vula sa oti, au vinakata sara tu ga na veivuke. Au sega ni cakacaka, qai tolu na luvequ. Au sega sara ga ni tadra na levu ni kakana e vakarautaki mai qo vei keitou, ena rauti keitou tu me vica vata na siga. Vinaka vakalevu Jiova!”

Meda kerea mada ga vei Jiova me vakalougatataki ira tiko ga na tacida kei na cakacaka ni vakacoko. Eda vakanamata tu ena gauna sa na vuabale kina e vuravura na kakana.—Same 72:16.