Ena ika29 ni Okosita 2023, e caka na Soqo ni Veiwasewase e kena ulutaga ‘Vakaraitaka na Vosota!’ ena raraniqito e Martyr Stadium e Kinshasa, ena Democratic Republic of the Congo. E sevutaki kina na vakadewa vakavoutaki ni New World Translation ena vosa vakaLingala, kei na so tale na wase ni New World Translation ena vosa vakaAlur, vaKinande, vaKipende, vaKisonge, vaKituba, kei na vosa vakaUruund. A vunau kina o Brother Mark Sanderson, e lewe ni iLawalawa Dauvakatulewa, ra qai tiko kina e rauta ni le 75,715. Era sema tale ga ena internet e le 219,457 mai na 53 na Vale ni Soqo Lelevu, kei na so tale na vanua e qarava na valenivolavola ni tabana. E veisoliyaki na itabataba vakavoutaki ni New World Translation ena vosa vakaLingala, kei na New World Translation of the Christian Greek Scriptures ni vosa vaKisonge. Na vo ni vakadewa ena qai veisoliyaki vakamalua. Ia sa rawa mada ga ni download ena iyaya vakalivaliva na vakadewa kece ni iVolatabu qori. Qo na ka e sevutaki:

• Rauta ni le 1,750,000 na lewenivanua e Mahagi era vosataka na vosa qori

• Era veiqaravi tiko e le 1,609 na dautukutuku ena 45 na ivavakoso vosa vakaAlur

• Ena 2013 era tekivu vakadewataka na tacida na ivola vakaivolatabu ena vosa qori

• Tiko e Bunia na valenivolavola ni vakadewa tu yawa (RTO)

• Rauta ni le 903,000 era vosataka na vosa qori e Ituri kei North Kivu

• Era le 4,793 na dautukutuku era veiqaravi tiko ena 78 na ivavakoso vosa vaKinande

• Ena 1998 era tekivu vakadewataka na tacida na ivola vakaivolatabu ena vosa qori

• Tiko e Butembo na RTO

• Rauta ni le 2 na milioni era vosataka na vosa qo ena yasayasa o Kasai, Kwango, kei Kwilu

• Era le 3,349 na dautukutuku era veiqaravi tiko ena 88 na ivavakoso vosa vaKipende

• Ena 1996 era tekivu vakadewataka na tacida na ivola vakaivolatabu ena vosa qo

• Tiko e Kikwit na RTO

• Rauta ni le 1 na milioni era vosataka na vosa qori, ra qai vosataka vakalevu na tiko ena yasayasa o Lomami

• Era le 1,043 na dautukutuku era veiqaravi tiko ena 31 na ivavakoso vosa vaKisonge

• Ena 2006 era tekivu vakadewataka na tacida na ivola vakaivolatabu ena vosa qori

• Tiko e Kinshasa na ofisi ni vakadewa

• E sivia ni le 12 na milioni era vosataka vosa qori ena ceva ni Republic of the Congo, e Angola kei Gabon

• Era le 2,137 na dautukutuku era veiqaravi tiko ena 30 na ivavakoso vosa vaKituba

• Ena 2019 e tauyavu na kena RTO e Pointe-Noire

• Sivia ni le 40 na milioni era vosataka na vosa qori

• Era le 74,023 na dautukutuku era veiqaravi tiko ena 1,266 na ivavakoso vosa vakaLingala

• Ena veiyabaki ni 1960 era tekivu vakadewataka na tacida na ivola vakaivolatabu ena vosa qo

• Ena 2009 e sevutaki na New World Translation ena vosa vakaLingala

• Tiko e Kinshasa na ofisi ni vakadewa

• Rauta ni le 153,000 era vosataka na vosa qo ena yasayasa o Lualaba

• Era le 553 na dautukutuku era veiqaravi tiko ena 19 na ivavakoso vosa vakaUruund

• Ena 1994 era tekivu vakadewataka na tacida na ivola vakaivolatabu ena vosa qo

• Tiko e Kolwezi na RTO

Ena yaga vakalevu vei ira na tacida na vakadewa ni iVolatabu qori ena yalava era veiqaravi kina. E kaya e dua na tacida vosa vaKituba: “Era sega ni dauvakarorogo na tiko ena yalava ni keimami sega ni vakayagataka na ivola ena nodra vosa. Kena ivakaraitaki, era na sega ni kila na ibalebale ni tikinivolatabu ke wiliki ena vosa vakaVaranise. Ia na vakadewa vou qo, ke sega mada ga nira kila vinaka na wiliwili e se rawa ga nira rogoca qai yaga vei ira na Vosa ni Kalou.” Me baleta na yaga ni kena vakavoutaki na New World Translation ena vosa vakaLingala, e kaya e dua na tacida: “Na matata ni vosa ena iVolatabu qo, e vaka ga na iyau e tiko ena dua na kato mo qai wasea vei ira eso tale ena cakacaka vakavunau.”

Eda nuidei ni o Jiova ena vakalougatataki ira na tacida nira vakayagataka na vakadewa vou qori mera vukei ira na “via rogoca na vosa ni Kalou.”—Cakacaka 13:7.