Sa taravaki tiko na itikotiko vou e Lubumbashi ena Democratic Republic of the Congo. Qori na vanua ena tiko kina na valenivolavola ni tabana. Ena Me 2022, e namaki mera sa na toki ena itikotiko vou qori e rauta ni 260 na lewenivuvale e Peceli, e le 131 tale era na tiko ga e Kinshasa na vanua e se tiko kina na valenivolavola ni tabana ena gauna qo. a Sa taravaki tale ga eso tale na itikotiko kei na ofisi volekati Lubumbashi. Ena Janueri 2024, e tuvanaki tiko mera na toki e kea e rauta ni 48 na tacida. Na itikotiko vou qo ena tokona na tubu ni dautukutuku, kei na cakacaka vakavunau e Congo.

Ena yabaki vakacakacaka ni 2021, e sivia na 250,000 na nodra vuli iVolatabu na tacida ena Democratic Republic of the Congo. E sivia na dua na milioni era tiko ena iVakananumi ni mate i Jisu. Gauna qo, e rauta ni 394 na lewenivuvale e Peceli era veiqaravi tiko ena valenivolavola ni tabana e Kinshasa.

E dredre me vakalevutaki na itikotiko e Kinshasa, ra mani vaqara na tacida eso tale na vanua ena siti. Ra qai kunea e dua na itikotiko e Lubumbashi e rawa ni tara kina na valenivolavola ni tabana vou, kei na so tale na itikotiko vou ena gauna se bera mai.

E 2,300 na kilomita na kena yawa mai Kinshasa ina itikotiko e Lubumbashi. E 30 na eka na levu ni vanua ena tara kina na itikotiko, na ofisi, na valeniyaya, kei na dua na rumu levu ni kana kei na ka ni veivakamarautaki.

E tekivu na tarataravaki ena Noveba 2020, ia e qai vakadredretaka na vakatatabu ni COVID-19.

E kaya o Brother Robert Elongo, e lewe ni Komiti ni Tabana e Congo (Kinshasa): “E vakatabui na veitosoyaki, qori e vakadredretaka na kena vakau na iyaya ni tarataravaki. E taura tale ga na gauna na kena caka tiko na tarataravaki.”

E tomana o Brother Elongo: “Loma ga ni dua na yabaki, sa caka oti e dua na iwase ni tarataravaki.”

Eda kila ni vakalougatataka dina o Jiova na cakacaka qo. Meda masulaka mada ga ni itikotiko vou qo, ena ivakadinadina levu vei ira na lewenivanua e Congo, qai lagiti kina na yaca i Jiova.—Maciu 24:47.