Dua na ka na vakacaca ni cagilaba kei na waluvu ena Democratic Republic of the Congo, ena loma kei Aferika. E ripotetaka na valenivolavola ni tabana e Congo (Kinshasa) ni levu na tacida era vakaleqai ena waluvu qori. Ka ni rarawa ni mate e dua na tacida tagane ena waluvu ena koroturaga e Kinshasa.

Qo na ripote ena valenivolavola ni tabana e Congo (Kinshasa):

• E vakacacani ena cagi kaukaua kei na bi ni uca nodratou vale e ono na tacida ena ra kei Kasai.

• E luvu na Vale ni Soqoni e tiko ena vuaira e Sud-Ubang. Tolu na ivavakoso e vakayagataka tiko na Vale ni Soqoni qori, ra qai le 69 na kena dautukutuku. Era vakaleqai tale ga ena waluvu e 22 na vuvale. E tuvanaka kina na valenivolavola ni tabana e dua na painia lavotaki kei na dua na qase ni vavakoso me rau vakarautaka na veika vakayago, rau veivakayaloqaqataki tale ga vei ira na tacida era vakaleqai ena vanua tu yawa.

• Era tokitaki o ira na tacida ena yasana e Tshopo era tiko ena Congo River. Kuria ya, e luvu e dua na Vale ni Soqoni ena yasayasa qori.

• Era ripotetaka na ivavakoso ena koroturaga e Kinshasa nira vakaleqai ena waluvu e rauta e 80 na vuvale.

Ni oti na waluvu dua na ka na duka ni vanua, e laurai tale ga ni rawa ni vakavuna na tauvimate. E veivakasalataki kina na valenivolavola ni tabana vei ira na tacida na sala mera taqomaka kina nodra bula.

Era sotava na tacida na dredre, ia era veivukei ena ka vakayago me vaka na kakana kei na isulu. Ena veidusimaki ni valenivolavola ni tabana sa veitokoni tale ga na Komiti ni Vakacoko.

Na noda masu, veivuke vakayago, kei na veivakayaloqaqataki ena iVolatabu e vakarautaka na isoqosoqo i Jiova ena “vakacegui ira kece na tagi” ena gauna dredre qori.—Aisea 61:1, 2.