18 JULAI, 2018
DEMOCRATIC REPUBLIC OF THE CONGO
Era Dro na Tacida Mai na Vuaicake kei Congo ena Vuku ni Tiko Yavavala
Ena Tiseba 2017 era tekivu veivaluvaluti vakalewenivanua o ira mai na Democratic Republic of the Congo, qo o ira ena yasayasa o Hema kei ira mai na Lendu. Levu era mate kina, ra qai biu vanua e vica vata na udolu. Na tiko yavavala qori era bau vakila tale ga e levu na tacida, qai sega ni mudu rawa.
E vakavuna gona mera dro i Uganda e vica vata na udolu na isenivalu mai na Congo, okati kina e le 192 na dautukutuku era tiko ena rua na keba ni isenivalu volekata na iyala ni vanua e Congo. Me yacova mai na June 2018, e 1,098 tale na iVakadinadina era dro i Bunia, na koroturaga ni yasayasa o Ituri. E ka ni rarawa ni mate e dua na veiwatini, vaka kina e tolu na gone lalai erau dautukutuku papitaiso na nodratou itubutubu. Ratou mate na gone qori ena vuku ni tauvimate. Ia e sega ni dua na tacida e mate ena veivaluvaluti vakadomobula qori.
Era taba toka qo ena rara ni Vale ni Soqoni Lelevu e Bunia o ira na tacida era dro mai na dui vanua e Ituri.
E butakoci se kama yavu na nodra vale e levu na tacida era dro. Vakacacani tale ga e levu na kakana era tea tu me kedra.
Na gauna e tekivu kina na tiko yavavala, era veivuke na tacida era sega ni tiko ena vanua ni veiraravui qori. Era solia eso na tacida na nodra motoka mera tokitaki kina na dautukutuku ina vanua mera lai taqomaki se vakarurugi kina (raica na imatai ni taba). E 205 tale ga na vuvale iVakadinadina i Jiova era sega ni rawaka mai Bunia era cau vakailavo, kakana, ra qai veivakaicilitaki vei ira na tacida era dro yani. E tiko e Bunia e rua na keba ni isenivalu e rauti ira vinaka na dautukutuku era dro yani, ia era veivakaicilitaki ga na mataveitacini.—Vosa Vakaibalebale 17:17.
E tauyavutaka na Komiti ni Tabana e Congo e dua na Komiti ni Vakacoko, e vakarautaka vei ira na tacida na veika era gadreva. Dua tale ga na mata mai na tabana e sikovi ira yani na tacida me vakauqeti ira vakayalo.
O ira na mataveitacini era dro i Bunia kei na yasana voleka era sa lai sokalou tiko ena ivavakoso e tiko e kea, ra gumatua tale ga ena vunautaki ni itukutuku vinaka. Mai na Feperueri ina Epereli 2018, era tekivutaka na tacida e sivia na 270 na vuli iVolatabu kei na so ena keba ni isenivalu.
Keimami masulaka ni na vakacegui ira tiko ga na mataveitacini e Congo o Jiova, ena vakalougatataka tale ga na veivuke ni vakacoko e vakayacori tiko vei ira na dautukutuku. Eda rai vakanamata kece tiko ena siga me yaco mai kina na Matanitu ni Kalou, ni na dulaka na bula sautu dina kei na “vanua vinaka ni vakacegu” vei ira kece na dauveiqaravi i Jiova.—Aisea 32:17, 18.