Ena Julai 2019, e dolava na valenivolavola ni tabana ni iVakadinadina i Jiova e Scandinavia, na vanua vou me maroroi kina na iVolatabu. E tiko na valenivolavola ni tabana qori ena tauni o Holbæk, e Denmark, rauta ni 65 na kilomita na kena yawa e Copenhagen. E kena usutu “The Bible and the Divine Name in Scandinavia” (Na iVolatabu kei na Yaca ni Kalou e Scandinavia).

E vakaraitaki kina e levu na iVolatabu kunekunei dredre, e kilai levu tale ga me vaka ena vosa vakaDenmark, vakaFaeroese, vakaGreenland, vakaIceland, vakaNorway, vakaSaami, kei na vakaSuwiteni. E sivia na 50 na iVolatabu era tuvai tu kina.

Dua na iVolatabu kilai levu a vakadewataki taumada ena 1541 na Gustav Vasa Bible. E imatai tale ga ni iVolatabu me vakadewataki taucoko ena vosa vakaScandinavia. Na iVolatabu qori e tauyavutaki kina na ituvatuva ni vosa kei na vosa vakaSuwiteni. Era yavutaki tale ga kina eso na iVolatabu vakaSuwiteni ena 300 na yabaki e tarava.

E vakaraitaki tale ga e dua tale na iVolatabu e vakadewataki taumada ena 1550, e kunekunei dredre tale ga na Christian III Bible. Qori na imatai ni iVolatabu me vakadewataki taucoko ena vosa vakaDenmark. Na iVolatabu qori e vukea na tuvai ni vosa vakaDenmark, e yaga tale ga ena veivanua lelevu ena Noca kei Urope.

E vakamacalataka o Erik Jørgensen ena valenivolavola ni tabana e Scandinavia: “Na vanua vou era maroroi kina qo na iVolatabu, e vakaraitaka sara ga na kena dokai vakalevu na Vosa ni Kalou kei na lagilagi ni yaca i Jiova e Scandinavia ena vica vata na senitiuri sa sivi.”