Ena ika19 ni Julai, 2019, a vakayacori na soqo ni veimatanitu e Copenhagen, e Denmark. E sevutaka kina o Brother Stephen Lett, e lewe ni iLawalawa Dauvakatulewa, na New World Translation of the Christian Greek Scriptures ena vosa vakaIceland.

Ena mataka ni Vakaraubuka, e sureti ira kece na vosa vakaIceland o jeameni mera sota ena dua na rumu e toka ena vanua ni soqo ena gauna ni vakasigalevu. E solia kina o Brother Lett na iVolatabu vei ira na le 341 na tacida.

Vica na drau na yabaki nodra sasaga voli na lewenivanua e Iceland me vakadewataki ena nodra vosa na iVolatabu. Ena 1540, e tabaka o Oddur Gottskálksson na imatai ni Christian Greek Scriptures ena vosa vakaIceland. Tekivu ena 2010, era vakayagataka na tacida e Iceland na Bible of the 21st Century e tabaka na Icelandic Bible Company. Ia qo era sa na vakayagataka na tacida era vosa vakaIceland na iVolatabu e sevutaki, mera vunautaka na itukutuku vinaka vei ira na sivia na le 300,000 era vosataka tale ga na vosa qori.

E kaya e dua na tacida tagane e tiko ena timi ni vakadewa: “E rauta na va na yabaki na kena vakadewataki na Christian Greek Scriptures ena vosa vakaIceland. Na ka e duatani duadua kina ni vakayagataka sara ga na yaca i Jiova ena vanua e dodonu me biu kina ena tikinivolatabu. Qori e salavata kei na masu i Jisu ena Joni 17:26: ‘Au sa vakatakila vei ratou na yacamuni au na vakatakila tiko ga.’”

Eda vakavinavinakataki Jiova ni vukei keda tiko ga meda vunautaka na itukutuku vinaka e veiyasa i vuravura, e rawa ga qori ena kena vakadewataki na iVolatabu. E qaqa ni noda masu ni na levu tale era na via vulica “na veika vakatubuqoroqoro ni Kalou” nira wilika nona Vosa ena nodra vosa ni sucu.—Cakacaka 2:11.