Ena ika14 ni Okosita 2023, e dola e dua na vanua ni sarasara vou ena valenivolavola ni tabana ena Dominican Republic. E tiko ena siti o Santo Domingo. E vakarautaki kina eso na itukutuku makawa, e vakatokai “Na iLakolako ni Vakabauta.” Me vakataki ira ga na tacida e veiyasa i vuravura, era tusaqati qai vakatovolei na tacida e Dominican Republic. E vakaraitaki gona ena vanua ni sarasara na sala era toso tiko ga kina na tacida.

E laurai tale ga ena vanua ni sarasara na itekitekivu ni nodra cakacaka na iVakadinadina i Jiova ena Dominican Republic. Qori e okati kina na sala era tekivu wasea kina na ka dina nira vakayagataka na noda ivola kei na qaramavoni. E vakaraitaki tale ga na nodra vunau vei ira e levu nira vakayagataka na niusiveva kei na retio. Era na vulica tale ga na vulagi na kedra ivolatukutuku na daukaulotu era tekivu veiqaravi ena Dominican Republic ena 1945.

E tu tale ga ena vanua ni sarasara na sala era vunau tiko ga kina na tacida ena gauna e vakatabui kina na noda cakacaka ena Dominican Republic. Era tusaqati kaukaua na tacida, ia era yaloqaqa ni lavetaka qai veisoliyaka na noda ivola vakaivolatabu. Ena gauna qori, levu na lewenivanua era mai vulica na iVolatabu qai papitaiso mera iVakadinadina i Jiova. E vakaraitaki sara e muri na noda cakacaka ena Dominican Republic ena gauna qo kei na iwalewale ni vunau era vakayagataka tiko na tacida.

E kaya o Brother Leonel Peguero, e veiqaravi tiko ena valenivolavola ni tabana e Dominican Republic: “Era na raica na vulagi ena vanua ni sarasara, eso na iyaya makawa, eso tale ga na itaba ena gauna qo, na katokatoni kei na vidio. Ena vaka ga eda gade ina gauna makawa me yacova mai qo, meda raica na toso ni cakacaka me yacova mai nikua. Keimami sureti kemuni kece na rawa ni mai sarasara qai vulica na ivolatukutuku makawa ni noda cakacaka ena Dominican Republic.”