Ena Vakarauwai na ika5 ni Maji 2022, e sevutaka o Brother Alan Costa, e lewe ni Komiti ni Tabana e Ecuador, na New World Translation of the Christian Greek Scriptures ena rua na vosa ni vanua vakaQuichua. Qori na vosa vakaChimborazo kei na vosa vakaImbabura, e rua na vosa ni vanua e dau vosataki vakalevu e Ecuador. E sevutaki ena iyaya vakalivaliva kei na kena e tabaki ra qai sarava na dautukutuku nira sema ena internet.

Era vakaitikotiko e levu na lewenivanua vosa vakaQuichua ena veiulunivanua na Andes, rauta ni 2,700 ina 3,700 na mita na kena cere mai waitui. Era dau veivolekati vakaveiwekani, lomasavu, cakacaka vakaukaua, qai veikauaitaki. E levu vei ira era vakabauta na Dauveibuli qai doka vakalevu na iVolatabu.

Ena veiyabaki ni 1990, era vakadewataka na iVakadinadina i Jiova na ivola vakaivolatabu ena vosa vakaQuichua raraba, qori e tiko kina e vicavata na vosa ni vanua e Ecuador. Ia e le vica ga era tataleitaki qai via vulica na iVolatabu. E laurai gona ni vinakati vei ira na tacida mera vakadewataka na noda ivola ina nodra dui vosa ni vanua me rawa ni vuavuaivinaka na cakacaka vakaitalatala.

Era veivuke vakalevu ina timi ni vakadewa na dautukutuku mai na duidui vanua e Ecuador. Qo na ka e kaya e dua na daunivakadewa me baleta na kena vakadewataki na iVolatabu vakaChimborazo ena dua na yalava e levu tu na kena vosa: “Era vukei keitou na mataveitacini me donu na ivakarau ni neitou vakadewa qai matata vei ira e levu.” E kaya e dua na daunivakadewa ena vosa vakaImbabura: “Keitou vakadinadinataka na veidusimaki i Jiova, au kila gona ni vinakata o koya mera kila na tamata kece na nona Vosa.”

Dua dina na ka ni veivakalougatataki vei ira na tacida vosa vakaQuichua na rua na iVolatabu qo nira qarava na noda Kalou o Jiova na “nodra iVakabula na tamata kece ga.”—1 Timoci 4:10.