Ena ika24 ni Okosita 2021, e tokona na Mataveilewai ni Vakadeitaki Lawa e dua na nodra kisi ni veilewai na iVakadinadina i Jiova e Ecuador. E kaya na mataveilewai qori ni beci na nodra galala ni sokalou e San Juan de Ilumán, ena yasayasa o Imbabura. Na ka e cakava qori na mataveilewai e taqomaki kina nodra galala ni sokalou na lewenivanua kece e Ecuador, vakabibi o ira na itaukei ni vanua. Ena yaga tale ga na vakatulewa qori ena so tale na vanua.

Ena 2014, era curuma vakaukaua na iliuliu ni itikotiko na vanua era taukena na iVakadinadina i Jiova, ra qai saga mera tarova na tara Vale ni Soqoni. Era vakatabuya tale ga nodra soqoni vata na tacida kei na nodra vunau e veivale. Era mani kauta na tacida ina mataveilewai na ka e yaco qori. Ia rau kaya e rua na turaganilewa ena mataveilewai e ra ni sega ni beci na nodra dodonu na tacida.

Ni sega ni wali rawa na leqa qori, era mani kauta na tacida ina Mataveilewai ni Vakadeitaki Lawa, qori na mataveilewai cecere ena vanua qo. E mani kaya na mataveilewai ni beca na mataveilewai e ra na nodra galala ni sokalou na tacida. Era vakaroti kina na iliuliu ni itikotiko kei rau na turaganilewa mera lai tiko ena dua na vuli ni veika me baleta na galala ni sokalou kei na dodonu yadua ni tamata. Era vakaroti tale ga na iliuliu ni itikotiko mera taqomaki ira na lewenivanua e duidui nodra vakabauta kei na itovo, okati kina na nodra cakacaka na iVakadinadina i Jiova.

E kaya o Philip Brumley, na loya e dauvakasalataki ira na iVakadinadina i Jiova: “Eda kila ni dodonu ni tamata yadua ena taqomaka na nona itovo kei na ka e kilai tani kina ena dua na itikotiko. Ia e cala ke vakayagataki na lawa qori me vakaleqai kina nona dodonu e dua.”

Era marautaka vakalevu na iVakadinadina i Jiova e San Juan de Ilumán na vakatulewa e cakava qo na mataveilewai.

Eda marau nida raica na “liga i Jiova” ni vukei ira na tacida mera qaqa ena veilewai, qai taqomaki na nodra galala ni sokalou.—Vosa Vakaibalebale 21:1.