Era saga na mataveitacini e veiyasai vuravura mera veisautaka na iwalewale ni nodra vunau ni veitauvi tiko na matedewa na COVID-19. Era vakayagataka e levu na iwalewale ni vunau na iVakadinadina i Jiova e Ecuador, mera vunautaka kina na itukutuku vinaka.

Ena siti o Ambato, e text vei nona qasenivuli e dua na dautukutuku yabaki vitu kei na tinana. E va qo na nona text: “Ni bula saka, au via vakauta ga yani e dua na itukutuku veivakacegui nida sa bula tu qo ena dua na gauna dredre. E tu na inuinui ena iVolatabu ena Vakatakila 21:4 me baleta na veigauna vinaka se bera mai. Au sa vakauta tiko yani qo eso tale na itukutuku ena neimami website.”

E vola lesu vua e dua na qasenivuli: “Vinaka vakalevu noqu lewa. O se gone sara, ia sa bau veivakacegui na nomu itukutuku.” E vakavinavinakataki koya e dua tale na qasenivuli, qai taroga ke tiko na ivola iTalanoa mai na iVolatabu ena iyaya vakalivaliva. E kaya na qasenivuli qori ni a tu e dua na nona, ia e mani solia vei dua na nona gonevuli. E vakamacalataka o dautukutuku gone qori ni rawa ni download ena jw.org.

Rau vaqara e dua na veiwatini ena siti o Quevedo na nodra naba na sega ni iVakadinadina i Jiova me rau text vei ira. Qo na ka rau vola: “Au dua na iVakadinadina i Jiova. Keimami sega ni rawa ni vunau e veivale ena vuku ni matedewa e tete tiko qo, ia keimami na via veitalanoa kei kemuni ena vidio.”

Levu era ciqoma na nodrau kerekere. Dua vei ira qori e dua na marama, e sega ni dau taleitaki keda na iVakadinadina i Jiova. E vakavinavinakataki rau na veiwatini ena nodrau tu vakarau ni veivakacegui. E kaya na marama qori ni vakalomaocaocataki koya vakalevu na ituvaki sa yaco tu nikua. Rau mani vakauta vua na veiwatini ena internet na mekesini na Yadra!, Nb. 1 2020, e kena ulutaga “iWali ni Lomaocaoca.” Ni ratou veitalanoa tale ena dua na gauna, e vakavinavinakataka vakalevu na marama qori na nona mekesini, e sa wilika tale ga vakavica.

Ena tikina o Santo Domingo de los Tsáchilas, e vunau e dua na tacida yalewa didivara o Johana ni droini. a E vakauta ena text na itaba ni nona droini vei ira kece na nona itokani era didivara. Ia e sega ni kila ni vakauta tale ga vua e dua na yalewa e sega ni didivara. E totolo ga nona sauma lesu na text na yalewa qori ni levu nona taro. Ni sega ni matata vei Johana na ka e vola yani na yalewa qori, e qai sauma nona text e dua na tacida yalewa painia o Rhonda.

E kaya na yalewa ya vei Rhonda ni vakasamataka vakalevu na droini e vakauta yani o Johana. E taroga ke tukuni tale ga ena iVolatabu na veika sa yaco tu e vuravura nikua. E mani wilika vua o Rhonda na Luke 21:10, 11 qai vakauta tale ga vua na vidio Na Cava e Vakatara Tiko Kina na Kalou na Rarawa? kei Na Cava e Bulia Kina na Kalou na Vuravura? E vinakata na yalewa qori me rau veitalanoa tale.

Ni vesu tu na yapositolo o Paula, e “vunautaka sara vakavinaka na veika e vauca na Matanitu ni Kalou.” Era vakatotomuri koya tale ga na tacida nira vunau tiko ga ena gauna kece, ke sega ni rawa mada ga nira biubiu e vale.—Cakacaka 28:23.