Na Maji 2022 sa ika50 ni yabaki ni nodra vakalawataki na tacida e El Salvador. Oti ga nodra vakalawataki ena ika27 ni Maji 1972, e tubu na iwiliwili ni dautukutuku mai na 2,524 ina 5,632 ena 1976. Nikua, sa sivia e 38,000 na dautukutuku e El Salvador, ra qai veiqaravi ena 662 na ivavakoso.

Ena 1945, era lesi na daukaulotu ena vanua qori ra qai gumatua ena cakacaka vakavunau. Gauna ya, e rawarawa nodra vakadonui na daukaulotu mera lewenivanua e El Salvador. E tauyavutaki na veivavakoso, e tara tale ga e dua na valenivolavola ni tabana ena Me 1946.

Ena 1968, e buli e dua na lawa vou ya me kua ni dua na daukaulotu me tiko e El Salvador me sivia e lima na yabaki. Era kila na tacida ni na vakadredretaka qori na cakacaka vakaitalatala, ra mani kauta ena tabana ni lawa.

Ni voleka ni cava na 1971, era sureti e rauta ni 30 na qase ni ivavakoso ena valenivolavola ni tabana mera veivosakitaka noda vakalawataki. Ni caka tiko na bose e kerei ira na qase ni ivavakoso o Brother Baltasar Perla, Sr, a qai lewe ni Komiti ni Tabana e El Salvador, mera solia kece vua na nodra ivakatakilakila ni matanitu (identity card). E kaya ni na volai na yacadra, kei na nodra itikotiko ena ivola kerekere ina matanitu me baleta nodra vakalawataki.

E kaya o Brother Juan Antonio Flores, e dua tale ga na qase ni ivavakoso a tiko ena bose ya: “E vakamacalataka vei keimami o Brother Perla, Sr, ni na rawa sara ga ni keimami vesu i liu ke ra vakatabuya na vakailesilesi na neimami cakacaka. Baleta ni sa volai tu ena ivola ni kerekere na yaca i keimami, kei na neimami itikotiko.” E kaya o Brother Perla, Sr, ke dua e rere me vakasukai nona kad. E sega ni dua e kerea lesu na nona kad. Ia e sega ni vakatabuya na matanitu na noda cakacaka, e sega tale ga ni dua e vesu.

E rawa vinaka na veika era sasagataka na tacida, qai vakalawataki na noda isoqosoqo ena yabaki e tarava. Tekivu mai na gauna qori, sa rawa nira lewenivanua tale e El Salvador na daukaulotu. E rawarawa tale ga ni vakau na ivola vakaivolatabu ena valenivolavola ni tabana, kei na nodra vakamacalataka na tacida nodra tawaveitovaki e koronivuli kei na matanitu.

Ena ika26 ni Epereli 1972, qo na ka e tabaka na niusipepa e El Salvador me baleta na inaki ni kena vakalawataki na noda cakacaka: “Me vunautaki na ka dina ena iVolatabu, kei na itukutuku vinaka ni Matanitu ni Kalou. Me ivakadinadina ena yacana, nona vosa kei na nona veiliutaki cecere na Kalou kaukaua o Jiova.”

Oti e vicasagavulu na yabaki na kena tabaki na itukutuku qori, era se gugumatua tiko ga na vunau na tacida e El Salvador.—Aisea 25:9.