E kauai tiko na isoqosoqo na United States Commission on International Religious Freedom USCIRF website, ena nona vesu tu o Brother Tesfazion Gebremichael me sivia e 11 na yabaki. E tukuni tale ga ena nodratou website, ni ratou kauaitaka vakalevu nona bula “ni sa qase, sa yabaki 80 vakacaca tale ga.” Ena ika7 ni Okotova 2022, e tukuna raraba na komisina ni isoqosoqo qori me sere o Brother Gebremichael.

Ena ika20 ni Julai 2011, era vesuki koya na vakailesilesi ni vunau tiko vei ira eso tale. E sucu o Brother Gebremichael e Eritrea, ia e sega ni okati me lewenivanua e kea. Ena 1994, era sega ni vakatarai na tacida mera lewenivanua e Eritrea.

E iVakadinadina i Jiova o Brother Gebremichael ena Janueri 1971. E turaga dauloloma, yalovinaka qai veiyaloni kei ira na tiko veitikivi. Ena 1974, rau vakamau kei Lemlem, e iVakadinadina i Jiova tale ga. E va na luvedrau, qai lima na makubudrau.

E kaya o Sister Gebremichael: “Au leqataki watiqu ni tu e valeniveivesu, au nanumi koya tale ga. Ia au kila ni taqomaki koya tiko o Jiova. Dua na ka noqu qoroya ni saga me yalodina tiko ga vei Jiova. E levu na ka dredre keitou sotava vakavuvale, ia e vakaukauataki au noqu dau vakasamataka vakatitobu na Dauvunau 10:4. Au vakila tale ga na vakacegu.”

Ena 1991, e tusaqati ira na tacida na matanitu o Eritrea. Ena Tiseba 2020 ina Feperueri 2022, era sere e le 32 na tacida e Eritrea, e le 20 tale era se vesu tiko. E sega ni kilai na gauna era na sere kina. E rawa nira vesu ena nodra bula taucoko ni se sega ni vakatarai mera kauta nodra kisi ena mataveilewai.

Era kaya e levu na isoqosoqo e valataka na dodonu ni lewenivanua, nira sega ni taleitaka na ka e cakava tiko o Eritrea, ra qai kaya ni bibi me vakadodonutaki na ituvaki qori. Ena 2016, e kaya na Tabana ni Dodonu ni Lewenivanua e Eritrea ni okati me “veivakalolomataki ni kawatamata” na nodra tusaqati na tacida, kei na so tale.

Nona vesu tiko o Brother Gebremichael, kei na so tale na itabaqase, e vakaraitaka na nona veivakalolomataki o Eritrea vei ira na tacida. Tekivu ena 2011, ratou mate e va na tacida e valeniveivesu, kei na tolu na itabaqase ni ratou vakalolomataki ena gauna ratou vesu tu kina.

Era sega ni vakadonuya na vakailesilesi e Eritrea na nodra kerekere na tacida mera veivosakitaka na ituvaki qori.

Meda masulaki ira na tacida era vesu vakatawadodonu, da qai nuidei ni na taqomaki ira o Jiova.—Iperiu 13:3.