Ena ika30 ni June 2023, e sevutaka o Brother Joni Shalamberidze, e lewe ni Komiti ni Tabana e Georgia na ivola The Bible—The Good News According to Matthew ena vosa vakaMingrelia. Qo na imatai ni ivola ena iVolatabu me tabaki. E sevutaki ena soqo ni veiwasewase ni 2023, e kena usutu “Vakaraitaka na Vosota”! E vakayacori na soqo qori ena Vale ni Soqoni Lelevu e Zugdidi Georgia, ra qai tiko kina na le 627. E veisoliyaki na kena ilavelave tabaki, qai rawa ni download ena iyaya vakalivaliva.

E vosataki vakalevu na vosa qo ena yasayasa o Samegrelo ena ra kei Georgia. Ena 2019, e vakarautaki e dua na noda ofisi ni vakadewa tu yawa e Zugdidi.

E vica ga na isqosoqo era tabaka na ivola ena vosa vakaMingrelia, e okati kina o keda na iVakadinadina i Jiova. E kaya e dua na daunivakadewa, “E sega ni dau volai vakalevu na vosa vakaMingrelia, e sega gona ni dua na lawa ni kena ituvatuva ni vosa se sipeligi. Qori e vakadredretaka na kena vakadewataki. Sa qai tukuni me muri ga na lawa ni vosa vakaGeorgia, ia e sagai tale ga me rogo matau.”

Kuria qori, eso na vosa e volai ena iVolatabu, e sega na kena vosa vakaMingrelia. Kena ivakaraitaki, e sega na ivakadewa ni vosa “veivutuni.” Era mani vakamacalataka ga na ibalebale ni vosa qori na daunivakadewa me “rarawataki na ivalavala ca.”

Eda marau vata kei ira na tacida era vosa vakaMingrelia nira vakayagataka na ivola vou qo mera vukea e levu era “via kania era via gunuva na ivalavala dodonu.”—Maciu 5:6.