JUNE 19, 2024
GHANA
Vakaraitaki na Cakacaka ni Vakadewa ni iVakadinadina i Jiova
Ena ika11 ni Epereli ina ika11 ni June 2024, e caka na sarasara ena Vale ni Yau Maroroi e Accra, e Ghana. E vakaraitaki kina na nodra cakacaka ni vakadewa na tacida, e kena ulutaga “Promoting Literacy and Bible Education in the Native Languages of Ghana” (Uqeti na Wilivola kei na Vuli iVolatabu ena Vosa vakaGhana). E sivia ni le 1,300 era lai sarasara kina.
Ena 1937, era vakadewataka na tacida na imatai ni ivola vakaivolatabu ena vosa vakaGhana, kilai ena gauna ya me Gold Coast. Nikua sa vakadewataki ena 12 na vosa qori na ivola vakaivolatabu ena valenitabana e Ghana. E tu tale ga ena vanua ni sarasara qori na vidio, ivola vakaivolatabu kei na so na droini e vakaraitaki kina na itukutuku makawa me baleti ira na tacida. E vakamacalataki tale ga kina na sala e rawa ni laurai kina ena jw.org na ivola sa vakadewataki oti.
Era cakacaka vata na tabana ni Vale ni Yau Maroroi e Ghana, e le va na parofesa ena univesiti o Ghana kei ratou na tacida ena valenitabana ena kena tuvanaki na vanua ni sarasara qori. Ratou vakadikeva na parofesa na iwalewale ni nodra vakadewa na tacida me rawa ni vakavinakataki kina na ivakarau ni wilivola, kei na vakadewa ena vanua o Ghana. A gole sara kina e dua vei ratou na parofesa o Dr. Araba Osei-Tutu ena iTikotiko Liu ni iVakadinadina i Jiova e Warwick, Niu Yoka e Merika. Ratou qai gole na vo ni parofesa ena valenitabana e Ghana.
iMawi: Vosa tiko o Dr. Araba Osei-Tutu ni vakarau tekivu na sarasara. iMatau: Eso na ivola vakaivolatabu ena vosa vakaGhana
Ni dola na vanua ni sarasara, e kaya o Dr. Osei-Tutu: “E levu na ka era sa cakava na iVakadinadina i Jiova mera vukei ira na lewenivanua mera kila na wilivola kei na volavola. . . . Keitou vakavinavinakataki kemuni kece . . . oni vakaitavi ena cakacaka qo.”
Ni sarasara oti o Yaw Sekyi-Baidoo e parofesa ni University of Education, Winneba, e kaya: “Au dau raica tu ga mera dau veivakavulici na iVakadinadina i Jiova, ia qo au qoroya vakalevu na nodra cakacaka ni vakadewa.”
Qo na vanua ni sarasara era gole kina eso na parofesa ena univesiti o Ghana, vakailesilesi ni Vale ni Yau Maroroi e Ghana, kei na so na tacida
E kaya na mata ni iVakadinadina i Jiova e Ghana: “E veiuqeti nida raica na nodra vakavinavinakataki na tacida ena yaga ni nodra veivakavulici ena itikotiko. E vakalougatataka sara ga o Jiova na noda sasaga meda vukei ira na tamata kece mera mai kilai koya.”—Joni 17:3.
Rawa ni o Wilika Tale ga
E VAKAYAGATAKI VAKACAVA NA NODA CAU?
Tabaki na iVola Mareqeti Duadua
Levu na ka e okati ena kena vakadewataki, tabaki, qai dabani na New World Translation.
VANUA E MAROROI KINA NA KEDA ITUKUTUKU MAKAWA
Vakavulici na Wilivola kei na Volavola e Veiyasa i Vuravura
Era vakacaucautaki ira na iVakadinadina i Jiova na vakailesilesi ni matanitu ena veivuke levu era cakava ena kena toroi cake na ivakarau ni wilivola kei na volavola.