Ena Me 2019, era vakadonuya na vakailesilesi e Guatemala mera vakavulica na tacida na ivakavuvuli vakaivolatabu vei ira na daubokobuka kei ira na ovisa. E vakayacori na vuli qori ena siti o Coatepeque, Colomba Costa Cuca, Malacatán, kei San Rafael Petzal. Ra qai tiko kina e le 450 na daubokobuka kei na ovisa.

E kaya o Juan Carlos Rodas, e dua na qase ni vavakoso, e veivakavulici tale ga: “Sivia e 15 na yabaki nodra veivakavulici tiko na iVakadinadina i Jiova ena tolu na valeniveivesu e Guatemala. Era raica na vakailesilesi ni valeniveivesu ni veisautaka sara ga nodra itovo na kaivesu na nodra vulica na iVolatabu. Qori na vuna era vakatututaka kina me keimami cakacaka vuli iVolatabu tale ga vei ira na ovisa kei ira na daubokobuka.”

Ena veidusimaki ni valenivolavola ni tabana e Merika e Loma, e vakayacori vakarua na vuli ena dua na macawa, qai 15 na miniti na kena balavu. E veivosakitaki na sala me vinaka kina na ivakarau ni veimaliwai, kua ni vakatanitaki na veiliutaki, kei na cakacaka vata. Era vakaraitaka tale ga na tacida eso na ivola veiganiti vakaivolatabu, vidio ena noda website, kei na itukutuku yaga ena JW Library app.

E ka dokai vei ira na iVakadinadina i Jiova mera vakavulici ira na ovisa kei na daubokobuka. Eda nuidei ni na yaga vei ira na ivakasala vuku ena iVolatabu.—2 Timoci 3:16.