Ena Sigatabu na ika25 ni Okotova 2020, e sevutaki na Vakadewa ni Vuravura Vou ena tolu na vosa vakaIdia—na vosa vakaGujarati, vaKannada, kei na vosa vakaPunjabi. E soli e dua na vunau katoni qai sevutaki na iVolatabu ena iyaya vakalivaliva. Era sema tale ga ena porokaramu qori na dautukutuku mai na nodra dui vale. Oti qori era downloadtaka sara na iVolatabu ena nodra vosa.

E voleka ni 61 na milioni na lewenivanua e veiyasa i vuravura era vosa vakaGujarati.

Rau vakaitavi e rua na timi ni vakadewa me vitu na yabaki me vakacavari kina na cakacaka ni vakadewa. E kaya e dua na lewe ni timi ni vakadewa: “Dua na ka neitou marau ena gauna e sevutaki kina na iVolatabu qo. E rawarawa na vosa e vakayagataki kina, era kila mada ga na gone.”

E kaya tale e dua na daunivakadewa: “E vakalesui tale na yaca i Jiova ena vanua ga e dodonu me laurai kina. Keitou kila ni na vaqaqacotaka dina nodra vakabauta na tacida nira vakayagataka na iVolatabu nira vuli vakataki ira.”

E kilai rawarawa na vakadewa qo, keitou nuidei gona ni na yaga vakalevu vei ira na dauwiliwili kei ira na “yalomalua” mera mai kila na sala i Jiova.—Same 25:9.

E duidui vakalevu ni vosataki na vosa vaKannada kei na kena e volai. Eso tale ga na vanua e duidui na kena ivosavosa. E sega gona ni rawarawa vei ira na daunivakadewa mera vakayagataka na vosa rawarawa, vosa ni veisiga, me kua tale ga ni vakadewataki cala na vakasama ena iVolatabu.

Ratou vakadewataka na iVolatabu qo e tini na daunivakadewa, e taura e sivia ni vitu na yabaki me qai vakacavari. E kaya e dua vei ratou na daunivakadewa: “Ena vuku ni mate dewa na COVID-19, au nanuma sara ga ni na sevutaki na iVolatabu qo ena yabaki 2021. Ia ni sa sevutaki qo e vakaraitaka ga ni sega ni dua na ka e dredre vei Jiova.”

E kaya e dua tale vei ratou na timi ni vakadewa: “Dua dina na ka marautaki nira sa wilika na iVolatabu ena nodra vosa ga, rawa tale ga nira raica na yaca i Jiova ena vanua e dodonu me biu kina!”

Keitou nuidei ni na yaga vakalevu na vakadewa ni iVolatabu qo vei ira e sivia e 2,800 na dautukutuku era vosa vaKannada ena yalava e qarava na valenivolavola ni tabana e Idia. Ena yaga tale ga vei ira e voleka ni 46 na milioni era vosa vaKannada mera mai kila ni “titobu dina na veivakalougatataki ni Kalou, na nona vuku, kei na nona kilaka.”—Roma 11:33.

Ratou vakadewataka na Vakadewa ni Vuravura Vou ena vosa vakaPunjabi e ono na daunivakadewa me 12 na yabaki. Ena yaga vakalevu qori vei ira e sivia e 100 na milioni na lewenivanua era vosa vakaPunjabi e Idia kei na veiyasa i vuravura.

E kaya e dua vei ratou na daunivakadewa: “Keitou qarava na itavi qo ena veika sa tu rawa. Ia ena veivuke ga i Jiova, e vakacavari vinaka kina na kena vakadewataki. Na iVolatabu qo ena vaqaqacotaka dina nodra vakabauta na mataveitacini, ena solia vei ira na lomavakacegu, ena vukei ira tale ga mera vosota na veivakatovolei sa tu qo e matada.”

E kaya e dua tale na daunivakadewa: “Era na taleitaka dina na yalomalumalumu mera wilika na vakadewa qo, vakabibi na iVolatabu era volai vakaserekali. Ena yaga tale ga vei ira na ivukevuke ni vakekeli e vakarautaki kina.”

Eda duavata kei ira na tacida nida vakavinavinakataka na ‘cakacaka veivakurabuitaki i Jiova,’ e “sega ni tukuni rawa.”—Same 40:5.