Ena ika25 ni Okotova, 2019, e vakayacori na soqo ni veiwasewase e Hyderabad International Convention Centre e Hyderabad, e Idia. E sevutaka kina o Brother Ashok Patel, e lewe ni Komiti ni Tabana e Idia, na New World Translation of the Holy Scriptures ena vosa vakaTelugu.

E rauta ni 91.9 na milioni na lewenivanua era vosa vakaTelugu. E vosataki vakalevu e Idia na vosa vakaBengali kei na vosa vakaIdia, ia na vosa vakaTelugu e ikatolu ni vosa e vakayagataki vakalevu ena vanua qori. Gauna qo e rauta na le 6,000 na dautukutuku era veiqaravi tiko ena yalava vosa vakaTelugu, ia e le 8,868 era tiko rawa ena soqo. Qori e vakadinadinataka nira sa vulica tiko na ka dina e levu era vosa vakaTelugu. Sa tauyavutaki tale ga e rua na kena tabacakacaka.

E raica e dua na daunivakadewa ni iVolatabu qori, ni dredre mera kila na itabagone na vosa makawa e tiko ena so tale na ivakadewa ni iVolatabu vosa vakaTelugu. E kaya: “Na vakadewa vou qo, e vaka ga e vosa tiko o Jiova vei ira na itabagone. Ni vakayagataki kina na vosa ni gauna qo, e kilai rawarawa tale ga.” E kaya e dua tale na daunivakadewa: “Ena cakacaka vakavunau ke wiliki mada ga na tikinivolatabu e katuba, ena totolo nodra kila na lewenivanua na tikinivolatabu qori.”

Kuria ya, sa vakalutumi na yaca ni Kalou o Jiova ena levu na iVolatabu ena vosa vakaTelugu. Ia na New World Translation ena vukei ira na dauwiliwili mera kila na yaca ni Kalou Kaukaua Duadua. Era na kila tale ga na ibalebale taumada ni bula (soul) kei na yalo. Eso tale na ivakadewa ni iVolatabu era vakadewataka me salavata kei na vakabauta vakaIdu.

E kaya e dua na dautukutuku, “Au kila na iVolatabu qori ena vukei ira na lewenivanua mera kila ni lomani ira vakalevu o Jiova!” Na ivakadewa vou qori ena vukei ira na dauwiliwili mera “tovolea mada qai raica ni vinaka o Jiova.”—Same 34:8.