E sega ni rawarawa na ituvaki era sotava na tacida ena 11 na valenivolavola ni vakadewa tu yawa e Idia ena gauna ni matedewa na COVID-19. Era vakadewataka na noda ivola ena rauta na 36 na vosa. Ena veitokoni i Jiova, era raica rawa eso na sala mera walia kina na leqa e basika, ra qai tomana tiko ga nodra cakacaka.

E sega ni cakacaka ni le dua na vakadewa, e cakacaka ni timi. E dredre gona mera cakacaka vata na daunivakadewa ni tete tiko na COVID-19, qai tiko tale ga na vakatatabu ni matanitu. Era sega ni rawa gona ni katokatoni na timi ena valenivolavola ni vakadewa tu yawa.

Nira sa sega ni rawa gona ni sota na timi ena valenivolavola ni vakadewa tu yawa, era sa qiri ga ena vidio mai na vanua era dui tu kina, caka tale ga kina na katokatoni. Na iwalewale qori e vakarawarawataka vei ira na tacida e Bangladesh kei Merika mera vukei ira na daunivakadewa e Idia.

Era raica tale ga na tacida eso na sala mera vakadewataka kina na vidio ni vosa vagalu nira vakatabui tiko na sosoqoni vata vakalewe levu. Eso tale na daunivakadewa era vakayagataka nodra rumu ni moce me rumu ni katokatoni, era vakayagataka tale ga na iyaya e sa tu rawa me vaka na kateni kei na talevoni ena gauna ni katokatoni.

Kena ikuri, era nuitaki Jiova na daunivakadewa ena valenivolavola ni vakadewa tu yawa me donu tiko ga kina nodra ra qai cakacaka vagumatua ni va tu qo na ituvaki. Qo na ka era tukuna eso:

E kaya o Brother Jose Francis mai Kolkata, “Ni dau basika e dua na ituvaki dredre eda dau kauaitaka vakasivia, ia o Jiova e kila na kena iwali.”

E tukuna o Sister Bindu Rani Chandan mai Bangalore, “E vakamarautaki au vakalevu nona vakayagataki au o Jiova ena gauna dredre va qo.”

E kaya o Sister Rubina Patel mai Vadodara, “Sega ni dua na ka ena tarovi Jiova kei na nona isoqosoqo—na coronavirus mada ga.”

Eda vakavinavinakataka dina nodra gumatua na tacida ena cakacaka ni vakadewa. Eda vakadeitaka ni rawa kece qori ena yalo tabu ga i Jiova, ena vakayacori tale ga kina na ka e parofisaitaka o Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece.”—Maciu 24:14.