E vakaraitaka na tabana ni itukutuku nira mate ena vuku ni waluvu e le 169 ena ra kei Idia. E okati kina na vanua o Gujarat, Maharashtra, Karnataka, kei Kerala.

E ripotetaka na valenivolavola ni tabana e Idia, ni sega ni dua na tacida e vakaleqai se mavoa ena waluvu qori. Qo eso tale na ka e vakamacalataka na valenivolavola ni tabana.

Gujarat: Ena siti o Vadodara, e le 145 na dautukutuku e vakacacani nodra itikotiko ena waluvu. E sega ga ni vakacacani na valenivolavola ni vakadewa tu yawa e tiko e kea.

Maharashtra: Ono na vuvale e vakacacani nodratou vale e Mumbai. Era sa tokitaki e le 25 na dautukutuku era tiko ena siti o Sangli, e tiko ena rauta na 378 na kilomita ena cevaicake kei Mumbai. Era sa veivakaicilitaki tiko o ira ga na tacida era tiko voleka.

Karnataka: Ratou tokitaki e ono na vuvale. E tiko ena vanua qori na valenivolavola ni tabana, ia e sega ni vakacacani ena bisa ni uca se waluvu.

Kerala: Rauta ni 100 na vuvale era sa toki ena vanua cere, ra lai vakaicili tiko vakawawa vei ira eso tale na tacida. Sa dikeva tiko na Komiti ni Vakacoko na leqa tubukoso qori.

Sa tuvanaka tale ga na valenivolavola ni tabana, na iyaya ni vakacoko vei ira na vakacacani nodra vale. Era veivuke tale ga na ivakatawa ni tabacakacaka kei ira na Timi ni Tarataravaki mera dikeva na veika e vakacacani. E okati kina na veika era gadreva dina, me vaka na wai kei na so tale na iyaya, vaka kina na veiuqeti vakayalo.

Noda masu ni na tokoni ira tiko ga na tacida o Jiova. Eda rai vakanamata ena gauna na sosomitaki kina na leqa tubukoso ena “levu ni vakacegu.”—Same 37:11.