Na tau bi ni uca e Kerala mai Idia, e vakavuna na sisi ni qele ena 25 na vanua, ra qai mate kina e le 75. E kaya na tabana e dau qarava na draki e Idia, ni draki suasua qo e vakavuna sara ga me duatani duadua na tau bi ni uca ena cevaira ni vanua qori.

Ena vuku ni sisi ni qele qori e vakaraitaka mai na valenivolavola ni tabana e Idia, ni rau mate kina e dua na veiwatini iVakadinadina i Jiova rau yabaki 60 vakacaca kei na dua na vuli iVolatabu. E rua tale ga na vuli iVolatabu rau se curu tiko e valenibula ni rau mavoa vakaca. E luvu tale ga e dua na tacida tagane yabaki 17 ni saga me vukea e dua ratou tiko veitikivi.

E tuvanaki e dua na Komiti ni Vakacoko me dikeva na veika e vakacacani kei na veivuke me vakayacori. E vakayagataki eso na Vale ni Soqoni me qaravi kina na cakacaka qori. E laurai ena itukutuku e dikevi taumada ni vakacacani e rauta ni 46 nodra vale na tacida. E 85 na vuvale (475 na dautukutuku) era lai tiko vakawawa ena nodra vale na tacida se vei ira na wekadra. E volatukutukutaki ni so na Vale ni Soqoni era luvu, eso tale e veimama tu kina na wai ena vuku ni draki ca. Era tu vakarau na tabana ni vakacoko ni namaki me na tau bi tiko na uca ena vica na siga e tarava.

Era yavala na mata mai na valenivolavola ni tabana, ivakatawa ni tabacakacaka, kei ira na qase ni vavakoso ena nodra sikovi na mataveitacini mera vakacegui vakayalo, ra vakayaloqaqataki tale ga.

Keimami nanumi ira ena masu na vakacacani nodra itikotiko, se vakaleqai nodra bula ena vuku ni draki ca. Eda rai vakanamata ena gauna sa na vakaoti kece kina na leqa tubukoso va qori kei na rarawa.—Vakatakila 21:3, 4.