Ena ika4 ni Epereli 2021, dua na ka na vakacaca ni cagilaba o Seroja e Idonisia. E vakarautaki kina na veivuke ni vakacoko vei ira na tacida me vakavinakataki na nodra vale e vakacacani ena cagilaba. Qori e vaqaqacotaka dina nodra veilomani, qai uqeti ira tale ga na vakararai tu mera vakacaucautaki Jiova.

O Sister Ela Ludjipau, e dua na itubutubu le dua. A vakavinakataki na nona vale ena cakacaka ni vakacoko, e kaya: “Au qaravi ratou duadua tiko ga na luvequ, ia au vakila nira tu e yasai keitou na tacida.” E kaya e dua tale na tacida yalewa o Sister Yuliana Baunsele: “Oti ga na cagilaba era mai vukei keitou na mataveitacini. Au raica sara ga na levu ni nona kauaitaki keitou o Jiova.”

E kaya o Brother Dicky Thome, e lewe ni Komiti ni Vakacoko: “Dua na ka marautaki meda raica nona veivuke o Jiova vei ira na mataveitacini era vakaleqai ena cagilaba. E tarai keitou sara ga na nodra vakavinavinakataka na veivuke e caka vei ira. E vaqaqacotaka tale ga na neitou vakabauta na levu ni nodra nuitaka na veitaqomaki, kei na veivuke i Jiova.”

Eso tale era raica sara ga na ivakaraitaki ni loloma e caka vei ira na tacida. Kena ivakaraitaki, ratou tiko o Brother Marsel Banunaek kei na nona vuvale ena vanua dau yaco kina vakalevu na tikoyavavala vakayavusa. Era sega tale ga ni dau taleitaki keda na iVakadinadina i Jiova. Ia e kaya o Brother Banunaek ni gauna era raica kina nodra gole yani na mataveitacini mai na duidui yavusa mera lai vukei ratou, era kaya sara vua: “E lasutaki sara ga na ka keimami dau rogoca tu me baleti kemuni na iVakadinadina i Jiova.” E tukuna o Brother Banunaek: “Era qoroqoro nira raica na noda duavata, kei na noda veilomani. Era raica votu sara ga na wekai keitou na noda veilomani vakamataveitacini. Qo era sa via kila e levu tale na ka me baleti keda. Dua na ka neitou vakavinavinakataki ira na mataveitacini!”

O Mrs. Yosi Duli Ottu, e dua na ivakalesilesi ni matanitu. E qoroya vakalevu na nodra muria vinaka na tacida na vakatatabu ni COVID-19 ena cakacaka ni vakacoko. E kaya: “Au marautaka vakalevu na ka oni cakava vei ira na lewe ni nomuni lotu. E totolo na nomuni veivuke ena gauna e yaco kina na leqa tubukoso, qai vakarautaki vinaka na veika me qaravi kina nomuni cakacaka.”

Na leqa tubukoso e rawa ni vakacacana na vale, kei na iyau. Ia ena dei tu ga na nodra loloma, kei na nodra duavata na lotu vaKarisito dina. Eda marautaka vakalevu nida raica ni vaqaqacotaka noda veilomani na “cakacaka vinaka,” qai uqeti ira eso tale mera “vakalagilagi” Jiova!—Maciu 5:16.