Ena ika28 ni Noveba 2020, e sevutaka o Brother Geoffrey Jackson e lewe ni iLawalawa Dauvakatulewa, na New World Translation of the Holy Scriptures ena vosa vakaBatak Karo, vakaBatak Toba, vakaJava kei na vosa vakaNias. E sevutaki kece qori ena kena e tabaki kei na iyaya vakalivaliva. E katoni na porokaramu ra qai vakarorogo kina na ivavakoso kece ena veiyanuyanu e Idonisia. E rauta nira le 41,265 era sarava na porokaramu. E tomana o Brother Jackson ni na vakarau sevutaki tale ga ena iyaya vakalivaliva na New World Translation of the Christian Greek Scriptures ena vosa vakaSunda.

E sivia e tolu veimama na yabaki nodra gugumatua tiko na daunivakadewa mera vakadewataka na iVolatabu qori. E sivia e 100 na milioni na lewenivanua era vosataka e dua vei ratou na va na vosa qori. Kuria oya, e sivia e 2,600 na dautukutuku era vakayagataka na vosa qori ena cakacaka vakavunau kei na soqoni vakaivavakoso.

Sa sega ni matata vei ira na dauwiliwili ena gauna qo na ivolavolai kei na vosa e tiko ena iVolatabu makawa. E kaya e dua na daunivakadewa: “Na sevutaki ni New World Translation of the Holy Scriptures qo, au vakadeitaka kina ni vinakata na Kalou o Jiova mera wilika na tamata na iVolatabu ena vosa e kilai rawarawa qai tara na lomadra.”

E kaya o Daniel Purnomo e lewe ni Komiti ni Tabana e Idonisia: “Eda donuya tu qo na gauna dredre vakabibi ni veitauvi tiko na COVID-19. Ia era marautaka vakalevu na tacida era vosataka na vosa qo na kena vakarautaki mai na isolisoli vakayalo ena gauna donu.”

Eda vakavinavinakataki Jiova ni vakarawarawataka mera wilika nona Vosa e levu tale na tamata. Eda nuidei ni na yaga tale ga na kena ivakavuvuli vei ira e levu tale era vosataka na vosa qori.—Jemesa 1:17.