Ena ika8 ni Okosita 2019, e kaya na Mataveilewai e Samarinda ni cala na nodratou vakatalai tani mai koronivuli e tolu na gone ni ratou sega ni via vakarokorokotaka na kuila, se lagata na sere ni matanitu. E kaya na mataveilewai ni sega ni dodonu me ratou vakatalai tani mai koronivuli na gone qori, ia e dodonu me ratou lai vuli tale. Na vakatulewa qo e vakadeitaka vei ira na itubutubu e Idonisia ni donu vakalawa mera vakavulica na nodra lotu vei ira na dui luvedra. E sega tale ga ni dodonu mera totogitaki na gone ke ra muria na nodra vakabauta vakalotu na nodra itubutubu.

Ena Tiseba 2018, eratou vakatalai tani mai koronivuli o Yonatan, Yosua, kei Maria Tunbonat, eratou yabaki 7, 10, kei na 12. E kaya na Mataveilewai ni sega sara ga ni beci e dua na lawa, wili kina na Yavu ni Vakavulewa nira sega ni vakaitavi na gone ena vakarokorokotaki ni kuila kei na lagati ni sere ni matanitu; e kaya tale ga ni ratou sega ni beca na gone na ivakatakilakila ni matanitu se na kena ivakarau.

Eda marau ni rokova na mataveilewai na nodratou vakabauta vakalotu na gone, qai vakadonuya me ratou lesu tale i vuli. Eda nuitaka ni vakatulewa qori ena yaga tale ga vei ira na gone e iVakadinadina i Jiova na nodra itubutubu e Idonisia, era sotava tale ga na ituvaki qori e koronivuli.