Ena ika31 ni Tiseba 2019, e luvu e rauta ni 100 nodra vale na tacida ena bi ni uca e Jakarta, e Idonisia.

E sega ni dua na tacida e mate se mavoa. Ia era sa tokitaki e levu na dautukutuku, eso tale era sega ni biuta nodra vale ia era sa vakaruru tiko ena dua na vanua vinaka. E vakacacani tale ga vakalailai ena waluvu eso na vale dau vakayacori kina na soqoni. Era sa tuvanaka tiko na qase ni vavakoso na ka ni veivuke, me vaka na kakana kei na wai. Kuria ya, era veisiko na ivakatawa ni tabacakacaka vei ira na vakaleqai ena waluvu mera veivakacegui vakaivolatabu. E tauyavutaki e rua na Komiti ni Vakacoko, sa veivuke tale ga ena ka ni vakacoko.

Na waluvu qori e sega ni tarova nodra qaravi Jiova na tacida. Kena ivakaraitaki, eso na vuvale era vakaleqai era takosova na vanua e luvu mera tiko ena soqoni ena lomanimacawa. E kaya o Brother Daniel Purnomo, e lewe ni Komiti ni Tabana e Idonisia: “Ena veiyabaki sa sivi, qo e dua na waluvu e vakacaca vakalevu e Jakarta. Ia e sega ni vakayalolailaitaki ira na mataveitacini, e uqeti ira ga mera dauveivukei qai vakaraitaka na loloma vaKarisito.”

Eda rai vakanamata tu ena gauna sa na oti vakadua kina na leqa tubukoso.—Marika 4:39.