Ena Vakaraubuka na ika28 ni Seviteba, e kurea na yanuyanu o Sulawesi e Idonisia, e dua na uneune e 7.5 na kena kaukaua. Na uneune qori kei na ualoka e muria mai e vakaleqai kina nodra bula e sivia na le 1,300, qai levu vei ira qori era tiko ena siti o Palu ena lomadonu kei Sulawesi.

E ripotetaka na valenivolavola ni tabana e Jakarta nira bula kece na le 80 na dautukutuku era tiko ena vanua qori. E le vica ga era mavoa lalai, era sa qaravi tiko e valenibula. Dua na tacida e vakacacani vakadua nona vale, e le vica tale ga nodra vale na tacida e vakacacani vakalevu. E okati kina na vale era dau vakayagataka ena soqoni na iVavakoso o Palu.

Na Tabana ni Vakacoko ena valenivolavola ni tabana sa cakacaka voleka sara tiko kei na ivakatawa ni tabacakacaka, vaka kina na ivavakoso era tiko e kea mera veivuke. Ni lailai na kakana, wai, kei na so tale na ka e gadrevi mera bula kina na tacida, e tuvanaka na valenivolavola ni tabana mera vakarautaka e tolu na ivavakoso e toka voleka e kea na veika mera vukei kina na tacida e Palu. Era vakaitavi tale ga na qase ni vavakoso ena nodra vukei na dautukutuku me baleta na veika vakayago, vakayalo, kei na so tale na ka. Eratou na sikovi ira tiko na tacida e dua na lewe ni Komiti ni Tabana, ovasia ni Tarataravaki e Qarava na Valenivolavola ni Tabana, kei na ivakatawa ni tabacakacaka me ratou veitokoni, ratou veivakacegui tale ga.

Meda masulaki ira na tacida e Idonisia ni na nodra “ivakaruru” tiko ga, kei na “kaukaua” o Jiova ena gauna dredre qori.—Same 46:1.