Ena ika10 ina ika19 ni Me, era tuvanaka na iVakadinadina i Jiova e Tel Aviv, e Isireli, eso tale na vanua me caka kina na vunau e matanalevu. E vakayacori qori ni tubu ni iwiliwili ni saravanua era lai sarava na duidui itovo vakavanua ena siti qori. Kena ivakaraitaki, ena ika14 ina ika18 ni Me, e caka e Tel Aviv na veisisivi ivakatagi e vakatokai na Eurovision Song Contest. Era tiko kina e rauta na le tini na udolu na saravanua.

A veivuke o Brother Gennadi Korobov ena tuvanaki ni cakacaka qori, e kaya: “Gauna keimami rogoca kina ni levu era na gole mai e Tel Aviv, keimami nanuma ni qo e dua na gauna vinaka me vakarabailevutaki kina neimami vunau e matanalevu. Keimami marau nira bolecakacaka e rauta na le 168 na dautukutuku ena 22 na ivavakoso e Isireli.”

Era vakarautaka na tacida e veisiga na qiqi ni vunau ena walu na vanua, tekivu ena 9 na kaloko ena mataka ina 9 na kaloko ena bogi. Levu vei ira na sarasara era cavutu mai na duidui vanua, e biu kina ena qiqi na ivola vakaivolatabu ena vosa vakaArapea, vakaJaina, vakaValagi, vakaVaranise, vakaJamani, vakaIperiu, vakaItali, vakaJapani, vakaRusia, kei na vakaSipeni.

Eda nuidei ni na levu na ka ena rawati ena cakacaka lavotaki qori. E vakadinadinataka tale ga nira vakacaucautaki Jiova e “veigauna” na nona tamata.—Same 34:1, 2.