O Itali e dua na matanitu e veitauvi kina na vakalevu na matedewa na COVID-19. Ena veidusimaki ni iLawalawa Dauvakatulewa, e vakarautaka kina na valenivolavola ni tabana e Itali na sala mera vukei kina vakayago, vakayalo tale ga na tacida.

E qarava e tolu na Komiti ni Vakacoko na veika me baleti ira na tacida ena vualiku, loma, kei na ceva kei Itali. E veitaratara voleka kei na ivakatawa ni tabacakacaka na ilawalawa qase me baleta na ka era gadreva na lewe ni ivavakoso. Sa qai veitaratara na ivakatawa ni tabacakacaka kei ratou na Komiti ni Vakacoko.

Era sega wale ga ni veivuke ena ka vakayago na qase ni ivavakoso, era veivuke tale ga vakayalo. Qo na ka e kaya o Brother Villiam Boselli, e dua na ivakatawa ni tabacakacaka e veiqaravi voleka tiko e Milan, na imatai ni korolevu me tete kina na matedewa: “Dina nira tu ga e vale na tacida, ia era se veitalanoa tiko ga. Nira sema ena vidio ena gauna ni soqoni, qori e dua na gauna era veivakayaloqaqataki kina, ra saumitaro tale ga. E yaga mada ga vakalevu vei ira na itabaqase na qiri ena vidio ena gauna ni soqoni. Au raica nira sa qai duavata ga vakalevu na ivavakoso ni vakatauvatani eliu!”

Kuria ya, nira sa veitomani ena soqoni kei ira na tacida na wekadra era sega ni tiko ena dina. E kaya e dua na tacida yalewa: “E dau bese ni lai soqoni o watiqu. Ia qo sa rawa ni soqoni ga e vale. . . qai kila na cava? Dua na ka nona marautaka!”

Era vunau na tacida ena gauna kece ga. Kena ivakaraitaki, e kauta tiko e dua na tacida yalewa na nona idabedabe qiqi e dua na tacida itabaqase. Ratou mani tarovi koya e 3 na ovisa ena dua na vanua ni yadra. E vakamacalataka vei ratou ni vukea tiko e dua na itabaqase qai vakaraitaka na nona ivolatara ni veilakoyaki. E mani solia na tikidua Na Cava o Nanuma me Baleta na Veisiga Nimataka? kei na Ena Rawa ni Oti na Rarawa? Ratou taura na ovisa. Ni lesu mai na tacida yalewa, ratou tarovi koya tale na ovisa, ratou vakavinavinakataki koya qai taroga eso tale na taro me baleta na inuinui ena iVolatabu. E tomani ratou e rua tale na ovisa. E vakaraitaka sara na tacida yalewa na noda website. E kaya e dua vei ratou: “Vinaka vakalevu, keitou marautaka dina na nodatou veitalanoa nikua!”

E kaya o Brother Boselli: “Dina ni noqu itavi meu veivakayaloqaqataki qai vakacegui ira na tacida, ia au vakayaloqaqataki tale niu raica nodra volekati Jiova, ra qai qaravi koya tiko ga. Era lomani Jiova dina, qori e tarai au sara ga vakalevu. Era iloloma i Jiova vei keda, meda volekati ira tiko ga!”

E sega ni rawarawa dina na ituvaki era sotava tiko na tacida, ia eda vakadinadinataka nira volekati Jiova tiko ga, ra qai ‘sega ni yavalati ena vuku ni veivakararawataki.’—1 Cesalonaika 3:2, 3.