E tokona na mataveilewai ni rogokudru ena siti o Milan e Itali, na nodrau vakatulewa e dua na veiwatini iVakadinadina i Jiova ena nona qaravi vakavuniwai o luvedrau. E vakadeitaka na lewa e tau qori ni sega ni tu vua na mataveilewai na dodonu me tarova ke rau digia na itubutubu me caka vei luvedrau na veiqaravi vakavuniwai e sega ni vakayagataki kina na dra. E kaya na mataveilewai ni tu vei rau na dodonu me rau kua ni ciqoma na kena soli vei luvedrau na dra ena vuku ni nodrau vakabauta.

Ena Seviteba 2019, rau kauti luvedrau yalewa e vula tini e valenibula ni a lutu qai mavoa. Ratou kaya na vuniwai me sele. A vakayacori vinaka sara na veisele, e sega tale ga ni soli vua na dra.

Toso na gauna e bula vinaka tale o luvedrau, ia e kerea e dua na vuniwai vei rau na itubutubu me soli na dra vei luvedrau. E kaya ni na vakaukauataki koya. Ia rau dei tiko ga me caka vua na veiqaravi vakavuniwai e sega ni soli kina dra.

E sega ni vakadonuya na vuniwai nodrau kerekere na itubutubu, qai ripotetaki rau vei ira na ovisa kei ira na loya dauveibeitaki. E mani yalana na mataveilewai na nodrau kaukaua na itubutubu me baleti luvedrau, qai solia na lewa me baleti gone vua na dairekita ni valenibula. Ia ratou raica na vo ni vuniwai ni sega ni vinakati me soli vei gone na dra.

E kaburaki ena levu na siteseni ni tivi qai tabaki ena niusiveva na veika e yaco qori. Ia e levu na dauvolaitukutuku era kaya ni vakabulai na goneyalewa lailai ni vakataulewataka na mataveilewai me soli vua na dra.

Ena ika10 ni Seviteba 2020, e bokoca na mataveilewai ni rogokudru na lewa e tauca na mataveilewai e ra ni tarova na nodrau dodonu vakalawa na itubutubu. E vakacala na lewa e tau qai kaya ni sega ni dodonu ina mataveilewai e ra me cakava qori.

Qo na ka e vakataulewataka na mataveilewai ni rogokudru e Milan: “Rau sega ni vakadonuya na itubutubu me soli vei luvedrau na dra ena vuku ni nodrau vakabauta. E sega ni kena ibalebale ni rau sega ni lomani luvedrau, se me kau laivi kina na nodrau dodonu me rau vakatulewataka na veiqaravi me caka vei luvedrau.” Ena yabaki sa oti, e rokova e tolu na mataveilewai ni rogokudru e Itali na nodra vakatulewataka na itubutubu iVakadinadina i Jiova me caka vei luvedra na veiqaravi vakavuniwai e sega ni vakayagataki kina na dra.

E bibi mera kila na veiqaravi ena tabana ni lawa kei na valenibula nira sega ni dauveivakabulai vakacakamana na iVakadinadina i Jiova, se mera cata na vakayagataki ni wainimate. Ia era dau qara na veiqaravi vinaka duadua vakavuniwai, na vuniwai era kenadau, kei na valenibula e tu kina na iyaya kei na iwalewale ni veiqaravi ena dokai kina na nodra vakabauta. Era dau kerea vei ira na vuniwai mera vakayagataka na veiqaravi e sega ni vakayagataki kina na dra. E levu na vuniwai e veiyasa i vuravura era ciqoma na kerekere va qori, ra qai saga mera vakarautaka na veiqaravi vinaka duadua e sega ni vakayagataki kina na dra.

Eda marautaka nira veitokoni na mataveilewai vei ira na tacida nira vakatulewataka me kua ni soli vei luvedra na dra nira qaravi vakavuniwai.—Cakacaka 15:29.