Ena ika30 ni Okosita 2019, e vakalawataka na Mataveilewai Cecere e Roma, na dodonu ni nodra susugi na gone kei na nodra dodonu na itubutubu. Na vakatulewa qori, e tokoni kina nona dodonu e dua na tina iVakadinadina i Jiova me vakavulici luvena ena nona vakabauta.

Rau sa veibiu tu na veiwatini, ia e cikeva tiko o tamanigone e sega ni iVakadinadina i Jiova, me vakavulici o luvedrau ena nona vakabauta. E duavata e rua na mataveilewai e ra kei tamanigone, ni kaya na nona vakavulici o gone ena dua tale na vakabauta ena “vakavuna me veilecayaki.” E tiko tale ga nona dodonu o tina me vakavulici luvedrau ena nona vakabauta, ia na vakatulewa qori e dredre kina vua me veivakavulici. E veisautaka na Mataveilewai Cecere na vakatulewa ni mataveilewai e ra, e vakaraitaka tale ga vei rau na itubutubu “ni rawa ni rau vakavulici luvedrau ena nodrau vakabauta.” E vakaraitaka na Mataveilewai ni matalotu kece e “dodonu me rokova na lawa,” e sega tale ga ni dodonu me “veivakaduiduitaki,” me vaka e cakava na mataveilewai e ra vei ira na iVakadinadina i Jiova. E kaya tale ga ke basika na duidui vei rau na itubutubu ena nona vakavulici o gone ena vakabauta me tuberi kina, e sega ni tu vua na turaganilewa na dodonu me digia se matalotu cava e vinaka cake.

Eda nuidei ni vakatulewa e tauca qo na Mataveilewai, ena yaga ena veilewai kece e caka me baleta nodra tuberi na gone e Itali. Qori ena yaga dina vei ira na itubutubu ena nodra tuberi na gone ena “ivakavuvuli kei na ivakasala i Jiova.”—Efeso 6:4.