Ena ika17 ni Tiseba 2019, e veisautaka na Mataveilewai ni Rogokudru e Roma na vakatulewa ni mataveilewai e qarava nodra kisi na gone. E bokoca na mataveilewai qori nona dodonu vakaitubutubu e dua na tacida yalewa, ni sega ni vakadonuya me soli vei luvena tagane na dra. E kaya na Mataveilewai ni Rogokudru ni sega ni dua na cala nei tinana, e qai soli tale vua na nona dodonu vakaitubutubu. Ena yaga sara vakalevu na vakatulewa qori vei ira na itubutubu iVakadinadina i Jiova, ke basika ena dua na gauna na kisi va qori. E vakadeitaka ni na sega ni bokoci na nodra dodonu vakaitubutubu ke ra sega ni vakadonuya me soli vei luvedra na dra.

E basika na kisi qori ni laucoqa e dua na tacida yalewa kei na luvena tagane yabaki tini, e mavoa o gone qai kau i valenibula. Ni oti e tolu na siga, era vakatulewataka na vuniwai me sele. E vakadonuya na tacida yalewa me caka na veisele, qai vakadonuya na veiqaravi e vakatututaki vua, ia e vakamacalataka ni na sega ni vakadonuya na soli ni dra. E sega ni kisi bibi sara, e mani volavola na valenibula vua e dua na loya ni sega ni qarava vinaka tiko na luvena o tacida yalewa ena vuku ni nona vakabauta. E kerea na valenibula me soli na veivakadonui vei ratou na vuniwai me ratou solia na dra vei gone ke vinakati. E beitaki tacida yalewa na loya ni sega ni qarava vinaka na veika e baleti luvena tagane, qai kerea na mataveilewai ni gone me kau laivi na nona dodonu vakaitubutubu. E vakadonuya na kerekere qori na mataveilewai, dina ni sega ni vakadonui vakalawa. E qai kerea na tacida yalewa me rogoci tale na vakatulewa qori ena Mataveilewai ni Rogokudru.

E kaya na Mataveilewai ni Rogokudru ni tacida yalewa qo e dua na tina vinaka, e qaravi luvena vinaka tale ga. E vakatulewataka na mataveilewai “ni sega ni dodonu me beitaki na vakabauta vakalotu nei tinana ni vakavuna nona sega ni qaravi luvena vinaka kina, kei na nona sega ni vakadonuya me soli vua na dra.” E vakatulewataka na Mataveilewai me soli tale na dodonu vakaitubutubu vua na tacida yalewa. Qai tukuna ni sega ni vakadonui vakalawa na kena kau tani vua na nona dodonu vakaitubutubu.

E kaya o Nicola Colaianni, e lewe ni matabose ni Mataveilewai Cecere, e parofesa tale ga ni veika vakalawa ena University of Bari: “Au duavata kei na vakatulewa ni Mataveilewai ni Rogokudru. Ia au sega sara ga ni taleitaka na vakatulewa e cakava na mataveilewai ni gone. E dredre vei ira e levu mera vakila na galala ni sokalou, sa qai dredre sara qori vei ira na iVakadinadina i Jiova.”

E kaya o Brother Christian Di Blasio, e veiqaravi tiko ena tabana ni itukutuku e Itali: “Keimami vakavinavinakataka ni veisautaka na Mataveilewai ni Rogokudru e Roma na vakatulewa e yavutaki ena veivakaduiduitaki vakalotu. Era dau kauaitaki ira na luvedra na iVakadinadina i Jiova. Era vakavinavinakataki tale ga e levu na vuniwai ena vinaka ni nodra veiqaravi nira doka na neimami lewaeloma na lotu vaKarisito.”

Na vakatulewa ni mataveilewai e vakadeitaki tale kina na nodra dodonu na mataveitacini ena nodra qaravi vakavuniwai na luvedra. Eda vakavinavinaka vua na noda Kalou o Jiova ena qaqa ni veilewai qo, ni na vukei ira na tacida ena vakatulewa era cakava me baleta na veiqaravi vakavuniwai e sega ni veisaqasaqa kei na nodra lewaeloma se na iVolatabu.—Same 37:28.