E tokona na Mataveilewai Cecere kei Itali na nona dodonu e dua na iVakadinadina i Jiova, ya me lewa na veiqaravi vakavuniwai me caka vua. Ena ika23 ni Tiseba 2020, e duavata na Mataveilewai Cecere kei na lewa e tau ena dua na gauna sa oti. Qori nodra dodonu na tauvimate mera digia na veiqaravi vakavuniwai era vinakata, kei na veiqaravi e sega ni beci kina nodra vakabauta.

E veivosakitaki ena veilewai qori na ka vakaloloma a yaco ena 2005, era beca kina na vuniwai nona dodonu e dua na tacida yalewa. Ni bera ni sele, a tukuna vakamatata vei ratou na vuniwai ni sega ni vinakata me soli vua na dra, a solia tale ga vei ratou nona card ni dra (Advance Medical Directive). Ia ratou sega ni kauaitaka qori na vuniwai, ratou solia veitaravi ga vua na dra.

E kaya na mataveilewai ni nona sega ni via tauri dra e dua, “e sega ni baleta ga na veiqaravi vakavuniwai e vinakata. Ia e vauci tiko kina na nona vakabauta.” E kaya ni dau raici sara ga vakabibi na dodonu qori ena yavu ni vakavulewa ni matanitu.

Me tekivu mai na 2015, qo sa ikatini ni veilewai eda qaqa kina na iVakadinadina i Jiova ena Mataveilewai Cecere mai Itali. E tokona tu ga na mataveilewai na noda galala ni sokalou ena veilewai kece qori. Qo na kisi kece e veilewaitaki:

• Sega ni via tauri dra: Era vinakata na iVakadinadina i Jiova na veiqaravi vakavuniwai vinaka duadua. Levu gona na veiqaravi era vakadonuya. Era vakadeitaka na mataveilewai ni tiko nodra dodonu na iVakadinadina i Jiova, mera lewa na veiqaravi vakavuniwai e sega ni veisaqasaqa kei na nodra vakabauta. Ke dua na tauvimate e sega ni via tauri dra, e dodonu mera rokova qori na vuniwai. Qori na nodra dodonu yadua na tauvimate e yavutaki ena nodra vakabauta.

• Nodra susugi na gone: E tautauvata nodra dodonu na itubutubu kece, wili kina o ira na itubutubu iVakadinadina i Jiova, ya mera vakavulici luvedra ena nodra vakabauta.

• Veivakasivoi: O ira na iVakadinadina i Jiova era sega ni vakaduiduitaki ira na vakasivoi. Ia e tiko nodra dodonu yadua mera kua ni veimaliwai kei ira na vakasivoi. Qori na nodra dodonu ni sokalou, meda rokova kece na dodonu qori.

• iVakacavacava: Era dau sauma na iVakadinadina i Jiova na nodra ivakacavacava. E tautauvata na dodonu e soli vei ira me vakataki ira ga na vo ni matalotu mai Itali, wili kina nodra galala mai na kena saumi na ivakacavacava ni vanua ni sokalou.

E uqeti keda dina na nodra dau taqomaka na vakailesilesi ni matanitu, na nodra dodonu na tamata i Jiova mera sokalou ena galala.—Vosa Vakaibalebale 21:1.