Dina ga ni tete tu na matedewa qai leqa na ka vakailavo, ia e sega ni tarova qori na kena tokitaki na valenivolavola ni tabana ni iVakadinadina i Jiova ina siti o Bologna, e Itali. Ena ika5 ni Seviteba 2020, e taravaki oti na imatai ni tabavale mera tiko kina na lewe i Peceli. E tuvanaki tiko me vakaoti taucoko na tarataravaki ena icavacava ni 2023.

Ratou lewena na Komiti ni Tarataravaki na Construction Project Committee (CPC) e lima na tacida tagane, ratou qai qarava na veika e vauca na tarataravaki. E saumi e dua na kabani me vakarautaka na peleni qai tara na vale mera tiko kina na lewe i Peceli. E tekivu na tarataravaki ena Seviteba 2018.

Ena 2019, e levu na kabani e tarai ira na leqa vakailavo. Qori e vakavuna me cegu vakalekaleka na tarataravaki qai veisautaki na ituvatuva ni cakacaka. Ia e sega ni vakabera qori na cakacaka ni sa tara oti tu e levu na ka.

Ena itekitekivu ni 2020, e veitauvi na matedewa na COVID-19 ena vualiku kei Itali wili kina na siti o Bologna. Era mani vakatabuya na vakailesilesi e levu na cakacaka ena siti, okati tale ga na tarataravaki. Ia oti e dua na vula, e laveti eso na vakatatabu e tomani tale kina na tarataravaki, qai muri tiko ga na lawa ni tabana ni bula kei na isoqosoqo me baleta na COVID-19.

E kaya o Brother Paolo Comparato e lewe ni CPC: “Keitou vakavinavinakataki Jiova ni vakacavari e dua na iwase ni tarataravaki qo. E levu na ka dredre e sotavi, ia ena veivuke ga ni yalona tabu e qaravi rawa kina.

E kaya o Cristina Dallacasa, na jeameni ni kabani ni tarataravaki: “Keitou vakavinavinaka nira digitaki keitou na iVakadinadina i Jiova me keitou vakaitavi ena nodra tarataravaki e Itali. Keitou cakacaka kei ira ena duavata, e rawa tale ga ni keitou walia eso na ituvaki dredre ena gauna ni tarataravaki. Era dau qarava vinaka na iVakadinadina i Jiova nodra tarataravaki, vakabibi mera kua ni mavoa o ira na vakaitavi kina. Ia au taleitaka sara vakalevu noqu mai veikilai kei na dua na ilawalawa tamata era daudina qai nuitaki. E veiuqeti dina qo vakabibi ni vakilai tu na ituvaki dredre e veiyasa i vuravura.”

Eda nuidei ni o Jiova ena tokona tiko ga na tarataravaki qai lagiti kina na yacana.—Same 127:1.