Era vakaraitaka nodra vakavinavinaka na vuniwai na ituvatuva e tauyavutaka na isoqosoqo ena kena vakarautaki na itukutuku me baleta na veiqaravi vakavuniwai kei na veisele e sega ni vakayagataki kina na dra. E tiki tale ga ni ituvatuva qori na Tabana ni iTukutuku ni Valenibula mai na valenivolavola ni tabana e Roma, Itali. Ena icavacava ni yabaki sa oti, era vakarautaka na mata ni Tabana ni iTukutuku ni Valenibula, kei na Komiti Veitaratara kei na Valenibula eso na itukutuku ena yaga ena bose e vakatokai na National Congress of the Italian Society of Anesthesia, Analgesia, Resuscitation, and Intensive Care (SIAARTI), a vakayacori ena ika10 ina ika13 ni Okotova, 2018 mai Palermo e Sisili. Ni oti ga na bose qori, era tuvanaka tale e dua na vanua ni sarasara ena Joint Congress of the Scientific Societies of Surgery e caka ena “La Nuvola” Convention Center mai Roma.

Na bose va qori e gauna vinaka tale ga mera kila kina na itukutuku vovou e levu na kenadau ena veiqaravi vakavuniwai me baleta na wainimate e rawa ni vakayagataki e sega ni okati kina na dra. Era tiko ena bose qori mai Palermo e le 2,800 na vuniwai era dauniveivakamoceri. Na bose e caka mai Roma e bose levu duadua ni dauveisele me bau caka e Itali, era tiko kina e le 3,500 na dauveisele. E levu na mata qori era cavutu mai na duidui koronivuli rogo ni vuniwai. Era okati kina na dauveisele kece e Itali kei ira mai na isoqosoqo na Italy Chapter of the American College of Surgeons. Era veitokoni e vica na isoqosoqo me vaka na Tabana ni Bula.

E sikova tale ga yani na vanua ni sarasara qori e Palermo na vuniwai e dauniveivakamoceri o Vincenzo Scuderi, mai na Policlinico Hospital e Catania mai Sisili. Ena ika18 ni Janueri, 2019 a vinakati me qaravi vakatotolo e dua na tacida me sele nona ua ni dra. A rawa vinaka na veisele vereverea qori ni sega ni vakayagataki na dra. E kaya o Dr. Scuderi: “[Na vanua ni sarasara qo] ena bose ni SIAARTI 2018 e yaga sara ga vakalevu. E veivuke ena neimami veiqaravi na vuniwai.”

Ena gauna qo, era duavata e sivia e 5,000 na vuniwai e Itali mera qaravi ira na iVakadinadina i Jiova ena iwalewale ni veisele e sega ni rivarivabitaki kina na bula, e rawarawa tale ga ni sega ni vakayagataki na dra. Ena veiyabaki e Itali, era qaravi vakavuniwai ena sala qori e rauta ni 16,000 na iVakadinadina i Jiova.