Ena ika6 ni Epereli 2018, e vakatulewataka na mataveilewai e Termini Imerese, e Sicily mai Itali, ni cala vakalawa e dua na dauniveisele ni vakasaurarataka me soli na dra vua e dua na marama iVakadinadina i Jiova. E vakaroti me sauma vua na marama qori e 10,000 na ilavo ni Igiladi (euros) (kena ivakatautauvata ni $11,605 na ilavo ni Merika). Me sauma tale ga e 5,000 na ilavo ni Igiladi (kena ivakatautauvata ni $5,803 na ilavo ni Merika) vua na watina iVakadinadina i Jiova. Qo se qai imatai ni gauna me vakatulewa kina na mataveilewai e Itali vua e dua na vuniwai ni cala vakalawa nona saqata na dodonu e tu vua e dua na tauvimate me baleta na ka e caka ina yagona ni yavutaka ena nona vakabauta.

Na kisi qo e baleta tiko nona sele e dua na tacida ena Tiseba 2010 ni kune na mate ena nona kato ni suasua. E vakila ni sega ni vinaka nona bula ni oti nona sele. A sega ni vinakata me soli vua na dra, ia ra qai vesuki koya me soli vakaukaua vua na iwasewase ni dra na red blood cells. E lasutaki koya na dauniveisele ni sa vakarota qori o turaganilewa.

Erau mani gole vakaveiwatini ina valenivolavola ni Dauveibeitaki me rau lai vakaraitaka kina na veika e vakayacori vei rau. E mani vakatulewataka na mataveilewai, “ke dua na iVakadinadina i Jiova uabula e rawa ni vakatulewa ga vakataki koya . . . me kua ni solia vua o vuniwai na dra” ke sega ni vinakata.

E kaya na mataveilewai ni vakatabuya na yavu ni vakavulewa e Itali me caka vua e dua na veiqaravi vakavuniwai e sega ni vakadonuya, kevaka mada ga e vakatututaka o vuniwai ni na vinaka ina nona bula. E vakatulewataka na mataveilewai ni “cala nona vakasaurarataka o vuniwai nona nanuma vua e dua na tauvimate . . . ke sa vakaraitaka mai vakamatata, e vakatulewa tale ga vakataki koya ni sega ni vinakata na veiqaravi qori.”

Me baleta na veiqaravi vakavuniwai e vakamacala kina o Daniele Rodriguez, e parofesa ena Padua University. E kaya ni “nona dodonu e dua me cata na veiqaravi vakavuniwai, e tokona vinaka qori na Yavu ni Vakavulewa e vakamatatataki ena [iwasewase] 32 ni Yavu ni Vakavulewa e [Itali]. E tukuni kina ni ‘sega ni dodonu me vakasaurarataki e dua ena veiqaravi vakavuniwai vakavo ke vakarota yani na lawa.’” E vakamacalataka na turaga ni Itali o Luca Benci, e dau vakadikeva na veika me baleta na lawa, e kenadau tale ga ena tabana ni bula, ena ivola Quotidiano Sanità (Health Daily) me baleta na vakatulewa ni mataveilewai: “E sega ni dua na lawa me vakaukauataka na soli ni dra vua na tauvimate e cata na veiqaravi qori. E bibi cake sara na nona vakatulewa ina veika tale eso e vakayacori.”

E kaya o Marcello Rifici, e dua na loya e lewena tale ga na tabana vakalawa ni iVakadinadina i Jiova: “E marautaki ni vakatulewa qo e salavata vinaka kei na ivakatagedegede sa tauyavutaki me muri e Urope, vaka kina na vakatulewa ni mataveilewai e dau valataka nodra dodonu na lewenivanua e Urope (European Court of Human Rights). E kauaitaka na nodra vakatulewa yadudua na tauvimate me baleta na veiqaravi e vakayacori vei ira. Ena 2017 e vakadonuya na Palimedi e Itali e dua na lawa ena iwasewase 219/2017, qai kilai na lawa qo me ‘Living Will Law,’ e vakabibitaki tale ga kina na yavu ni vakatulewa qo.”

E kaya tale ga o Lucio Marsella, e dua na loya ena tabana vakalawa ni iVakadinadina i Jiova: “Na vakatulewa qo e ivakaraitaki vinaka sara ga me vakadeitaka vei ira kece na vuniwai mera vakayacora vinaka nodra itavi ra qai gumatua ni saga mera walia na kedra mate na tauvimate nira doka tiko na nodra vakatulewa yadudua.”