Ena ika15 ni Me 2019, e tokona na Mataveilewai Cecere Duadua e Itali (Supreme Court of Cassation), na nodra dodonu na tacida me baleta na veiqaravi vakavuniwai era digia. E vakadeitaka na Mataveilewai ni tu nodra dodonu na tauvimate mera digia e dua me vakamacala ena vukudra nira sega ni tauri dra. E tukuna tale ga ni sa vakadonuya na lawa e Itali me digitaka o koya e tauvimate e dua me vosa ena vukuna ke mani tauvimate bibi qai sega ni vakilai koya, se veilecayaki na yagona.

E vakatulewataki qori ena vuku ni vica na veilewai me baleti Brother Luca Cappelli, e dua na qase ni ivavakoso. E 25 na yabaki na kena sega ni drodro vinaka tu na dra ena nona mona. Na mate qori e vakavuna me caka vua e levu na veiqaravi vakavuniwai, eso na gauna e sega ni rawa mada ga ni vosa. Ni se bera ni qaravi vakavuniwai, sa vakalewena rawa tu na nona kad ni dra, e vola kina na yaca i watina o Francesca me vosa ena vukuna. Ia e sega ni vakadonuya qori o turaganilewa kei na mataveilewai levu. Sa na sega ni rawa gona vua me taqomaki koya vakalawa ke soli vua na dra.

Ena ika16 ni Feperueri 2017, e mani rogoci nona kisi o Brother Cappelli ena Mataveilewai Cecere. E vakatulewataka ni beca na mataveilewai e ra na Yavu ni Vakavulewa e Itali kei na European Convention of Human Rights, erau taqomaka na nodra dodonu ni vakatulewa na tauvimate. E vakasakiti na ka e kaya na Mataveilewai ni bibi dina me taqomaki, me rokovi tale ga na nona dodonu e dua e tauvimate, ke yavutaka ena nona vakabauta vakalotu na veiqaravi vakavuniwai e sega ni vakadonuya. Ena vinakati gona vua na mataveilewai e Itali me doka vakalevu na nodra sega ni tauri dra na tacida ena lewa ni Mataveilewai Cecere.

Eda marau vakamataveitacini ni tokona na Mataveilewai Cecere na nodra dodonu na tacida e Itali, nira vakayagataka na nodra lewaeloma vakavulici ena iVolatabu me baleta na dra.—Cakacaka 15:29.