E vakayacori ena ika22 ni Epereli 2023, e dua na soqo ena vanua e dau tu kina e liu na keba ni veivakararawataki e Flossenbürg mai Jamani. E vakaraitaki vei ira na tiko ena soqo e dua na vatu ni ivakananumi me baleti ira na iVakadinadina i Jiova era takali nira vesu tu ena keba qori. Qo na ikaciwa ni keba ni veivakararawataki me vakarautaka e dua na ivakananumi me baleti ira iVakadinadina i Jiova.

Era vesu ena keba e Flossenbürg kei na so tale na keba voleka e sivia na 100 na iVakadinadina i Jiova. Era tiko ena soqo eso na lewe ni nodra vuvale. E kaya e dua na tacida tagane, “eda rawa sara ga ni rarawa noda gole mai ena vanua e caka kina e levu na ka vakaloloma. Ia nida nanuma lesu na nodra yalodina na tacida, e marautaki qai ka dokai tale ga noda mai tiko ena soqo qo.”

E kaya o Parofesa Jörg Skriebeleit, e dairekita ni ivakananumi ena keba ni veivakararawataki e Flossenbürg, ni o ira na “iVakadinadina i Jiova era imatai ni matalotu me vakatabui ira na Nazi nira tekivu veiliutaki ena Maji 1933. E vukei ira na nodra vakabauta mera vosota na veika dredre era sotava ena keba. Era vunautaka mada ga na ka era vakabauta vei ira eso tale na kaivesu.”

E kaya vei ira na tiko ena soqo o Brother Wolfram Slupina, na mata ni iVakadinadina i Jiova e Jamani: “E bibi meda kua ni guilecava na veika era sotava na iVakadinadina i Jiova ena keba ni veivakararawataki. Qo na kedra ivolatukutuku na tutaka na nodra vakabauta ena gauna dredre duadua e Jamani.”

Eda nuidei ni volai tu na yacadra na tacida yalodina qori ena “ivola ni ivakananumi” i Jiova. —Malakai 3:16.