23 TISEBA, 2021
JAMANI
Sevutaki na iVola na Maciu kei na Joni ena Vosa Vagalu vakaJamani
Ena ika18 ni Tiseba 2021, e sevutaka o Brother Dirk Grundmann, e lewe ni Komiti ni Tabana e Urope e Loma, na imatai ni iwasewase ni New World Translation of the Holy Scriptures ena ivola na Maciu, kei na Joni ena vosa vagalu vakaJamani. E rauta ni le 800 era sarava ena stream na kena porokaramu.
Ena 2002, sa qai vakadeitaka kina na matanitu o Jamani ni dua na vosa na vosa vagalu vakaJamani. Ia tekivu mai na 1960, era vakarautaka na iVakadinadina i Jiova na daunivakadewa ena vosa vagalu ena soqo ni tabacakacaka, kei na soqo ni veiwasewase e caka e Jamani. Nikua, era veiqaravi tiko e 571 na dautukutuku ena 11 na ivavakoso vosa vagalu vakaJamani, kei na 21 na iwasewase lalai.
Vakadewa tiko ena vosa vagalu e dua na tacida tagane ena soqo mai Munich, e Jamani ena 1973
Qo se qai imatai ni gauna me vakadewataki kina e dua na iVolatabu taucoko ena vosa vagalu vakaJamani. I liu, era na rawa ni raica na dautukutuku na vakadewa ni tikinivolatabu yadua nira vuli vakataki ira, se nira cakacaka vakavunau.
E kaya e dua na dautukutuku: “Dau dredre meda raica na ivakavuvuli vakaivolatabu se na tikinivolatabu me tokona na noda vakabauta, ni sega tu na iVolatabu taucoko qai tu ga na tikinivolatabu yadua. E ka ni sasaga tale ga meda uqeti ira vakaivolatabu na gonevuli ni dredre me laurai na tikinivolatabu yadua.”
Katona tiko na vidio na timi ni vakadewa ena Vosa Vagalu vakaJamani
E kaya e dua na daunivakadewa: “Au marautaka ni rawa ni keitou vakadewataka na vosa i Jiova ena iVolatabu qo. Qori ena vukei ira na didivara mera veitokani voleka kei koya. E ka dokai dina me keitou vakaitavi ena cakacaka qo.”
Meda masulaka nira na mai kila e levu na yalomalua na sala i Jiova ena New World Translation vosa vagalu vakaJamani qo.—Same 25:9.