Era rarawataka vakalevu na iVakadinadina i Jiova e veiyasa i vuravura na vanavana e caka ena Vale ni Soqoni e Hamburg mai Jamani ena ika9 ni Maji 2023. Ratou gole o Brother Mark Sanderson, e lewe ni iLawalawa Dauvakatulewa, o Brother Gajus Glockentin, e dauveivuke ina Komiti ni Tabaivola, kei so era lewe ni Komiti ni Valenivolavola ni Tabana e Urope e Loma mera lai vakayaloqaqataki ira na tacida e Hamburg. Ena ika25 ni Maji, a caka na soqo ni veibulu ena dua na rara ni qito me baleti ratou na tacida e ratou vakaleqai. Era vakadinadinataka na tiko ena ivunau qori ni vakayaloqaqataki ira vakalevu na lolosi na iVolatabu. Levu era duavata kei na veika e tukuna e dua na tacida tagane a donuya na vanavana: “Nikua keimami vakila na levu ni nona lomani keimami o Jiova.”

E sivia ni le 3,300 era gole yani mera lai tiko ena soqo. Ra qai sema ena Internet e sivia na le 90,000 na iyaya vakalivaliva mera rogoca na porokaramu.

Era tiko tale ga ena soqo ni veibulu na vakailesilesi ni matanitu, na ovisa, tabana ni bokobuka kei ira na veiqaravi e valenibula. Qori e wili kina na Mea ni siti o Hamburg kei na nona ivukevuke, na peresitedi ni Palimedi ni Siti o Hamburg, na nona ivukevuke na mata mai Merika i Hamburg, na lewe ni Seneti ena tabana ni qito, na iLiuliu ni Seneti, na iliuliu ni ovisa e Hamburg, kei na ivukevuke ni peresitedi ni ovisa.

E tekivu na soqo ni veibulu nira vakatagitaka na tacida daunivakatagi na sere ni soqoni. E jeameni ena soqo o Brother Joachim Szewczyk, e lewe ni Komiti ni Tabana e Urope e Loma. E solia na vunau ni veibulu o Brother Dirk Ciupek, e lewe tale ga ni Komiti ni Tabana. Oti qori, e vakamacalataka vakalekaleka o Brother Sanderson e dua na ulutaga vakaivolatabu. E tinia o Brother Ciupek qai veivakayaloqaqataki na nona masu o Brother Glockentin. E lagati tale ga e dua na noda sere.

E vakamacalataka ena nona ivunau o Brother Sanderson ni Kalou e sega ni dau vakavuna na veika rarawa. Ia na ivola na Dauvunau, e vakatoka eso na ituvaki va qori me veika e “sega ni namaki.” (Dauvunau 9:11) E kaya o Brother Sanderson: “Ni yaco veika rarawa va qo, meda kua ni beitaka na Kalou. . . Me dei na noda inuinui, na noda vakabauta kei na noda veilomani. Eda na vosota kina na veicati kei na itovo kaukaua.” E vakavinavinakataki ira na ovisa, na tabana ni veivuke, kei ira na veiqaravi ena tabana ni bula ena nodra vukei ira na tacida.

E veivakayaloqaqataki na nona ivunau ni veibulu o Brother Ciupek. E kaya: “Ni yaco na vanavana ena ika9 ni Maji, era sega ni rarawa ga e le vica. Ia e tarai keimami kece. Eda soqoni mai nikua meda vakaraitaka na ka meda cakava nida cati se caka vei keda na itovo kaukaua. Eda via vakaraitaka na loloma, veikauaitaki, vakabauta kei na inuinui. Eda wilika ena iVolatabu, ‘Me kua ni rawai iko na ca, mo rawa tiko ga na ca ena vinaka.’ Eda soqoni mai nikua nida vinakata meda muria na ivakasala qori.”—Roma 12:21.

Era luluvu na tiko ena soqo ni cavuta yadudua o Brother Ciupek na yacadratou na vakaleqai ena vanavana. E kaya: “Eda gole mai nikua meda vakananumi ratou o Stephan, o Sebastian, o James kei Marie, o Stephanie, o Dan, kei Romy (na gone e se bera ni sucu, a vakamatei ena vanavana).” E vosa tale ga vei ira na wekadratou kei na itokani, e kaya: “Keimami tu vakarau ni vukei kemuni.”

E veiuqeti na itinitini ni nona ivunau ni vakamacalataka na nodratou talei na tacida e ratou vakaleqai. E yavutaka ena ka e tukuni ena Vakatakila 21:4, 5, e kaya: “Io eda nanumi ira vakalevu na wekada era sa takali. Eda lolositaki ira. Sa voleka mai na gauna ena vakaotia vakadua na Kalou na noda lolosi. . .Ni sa na sega na mate. Qori na ka e vunautaka o Jisu kei ratou na yapositolo. Qori na noda inuinui. E rawa ni ravuti o mate. E sega ni otioti ni ka. E kaukaua cake na Kalou vei mate. . . . E tiko gona na nodratou inuinui o Stephan, o Sebastian, o James kei Marie, o Stephanie, o Dan, kei na papa lailai o Romy.”

Ni oti na soqo ni veibulu, ratou vosa eso na vakailesilesi ni matanitu. Rau kaya o Dr. Peter Tschentscher, na mea ni siti o Hamburg kei Mrs. Carola Veit, na peresitedi ni siti o Hamburg ni rau duavata kei ira na weka kei na itokani ena nodrau lolositaki ratou na takali. E kaya o Dr. Tschentscher, nira ivakaraitaki vinaka ni “vosota kei na yaloqaqa ni dei na nodra vakabauta vaKarisito.” E wilika tale ga na nona ivola na Peresitedi kei Jamani, o Mr. Frank-Walter Steinmeier.

Era tiko tale ga ena soqo na daunitukutuku ni niusipepa, retio kei na tivi. E kaya e dua na daunitukutuku ena tivi: “E vakilai vakalevu na loloma ena soqo qo. Sa levu na soqo keimami dau tiko kina, ia e duatani duadua qo. E totoka na ivakamacala keimami rogoca.”

Rau vakamacalataka e dua na veiwatini rau tiko ena gauna ni vanavana: “Ena yaga na noda vakananuma vakatitobu na noda inuinui. Ena vinaka tale ga meda maliwai ira na tacida ena gauna eda lolosi tiko kina.”

E kaya e dua na tacida tagane e dau soqoni e kea: “Sa bau balavu dina na neimami lolosi. Dua na ka na noqu oca. Ia au marau niu mai tiko ena soqo ni veibulu qo. . . E veivakayaloqaqataki na ivunau keimami rogoca, okati tale ga kina na nodra vosa na vakailesilesi.”

Na soqo ni veibulu qo e ivakaraitaki ni nona loloma o Jiova. Eda kila ni na tokoni ira tiko ga na tacida e Hamburg o Jiova, na “Tama ni yalololoma, na Kalou e dau vakacegui keda ena ka kece”.—2 Korinica 1:3.