Ena ika6 ni Julai 2023, ratou taura na imatai ni cocovi e 15 na tacida itabagone ena siti o Kassel e Jamani. Ratou volatukutukutaka na nona yaloqaqa o Sister Wilhelmine Pötter, e mate ena nodra veivakasaurarataki na Nazi.

E vakarautaka na isoqosoqo na Stolpersteine ni Kassel Foundation eso na ivakananumi ena siti o Kassel me baleti ira na vakamatei ena gauna ni Nazi. E wili kina na kedrau ivakananumi o Wilhelmine kei watina o Justus Pötter. A vakayacani tale ga vei Wilhelmine e dua na gaunisala ena koro o Niestetal. Ena ikatini ni yabaki ni kena vakananumi na isoqosoqo qo, era sureti na gonevuli ena siti mera volatukutukutaka e dua e vakasaurarataki ena veiliutaki ni Nazi. Mera vakamacalataka tale ga na veika era vulica mai vua.

Ratou digitaka na tacida itabagone me ratou vakamacalataki Wilhelmine. Koya e gone duadua e yabaki 13, qai qase duadua o koya e yabaki 23. Ratou vakarautaka e dua na vidio me baleta na nona bula. Na ulutaga ni vidio na Talairawarawa ga Vua na Kalou qai 24 na miniti na kena balavu. E vakamacalataki kina na nona vesu vei ira na Nazi ena 1937 kei na nona takali ena 1942 ena keba ni veivakararawataki. E yabaki 49 o Sister Wilhelmine ena gauna qori. Kuria ya, ratou vakarautaka eso na itaba e laurai kina na nona ivola vei watina kei ratou nona vuvale ena gauna a vesu tiko kina. Na itaba qori era biu tu ena ikelekele ni basi ena gaunisala e vakayacani vei Sister Wilhelmini.

Ena ika25 ni Epereli 1937, e vola o Wilhelmine vei watina: “Bula Justus, au marautaka ni daru lomavakacegu tu ga qai yaloqaqa ena gauna e tau kina na kedaru i totogi. Ia ena gauna qo, me daru nuitaka tiko ga na Kalou qai muria na nona veidusimaki. Koya e bibi sara, au masulaka me vakaukauataki kedaru vakayalo, vakayago tale ga. Me daru dina ena nodaru yalayala qai vosota me yacova na icavacava. Na Kalou ena sega ni vakalaiva meda sotava na veivakatovolei eda sega ni vosota rawa. Koya gona, me daru nuitaka tiko ga na Kalou, e nodaru iLiuliu tale ga.” E saumi nona masu, ni rau yalodina tu ga me yacova sara na nodrau mate.

E kaya o Sister Alexandra Altemeier, e yabaki 23: “E kila o Wilhelmine kei watina ni rau na sotava na veitusaqati ni rau imuri i Jisu. Rau bolea na veitusaqati, na vesu, kei na nodrau itotogi mate. Rau vakadeitaka ni na sega ni guilecavi rau na Kalou.” E kaya o Brother Ole Schröder, yabaki 18: “E uqeti au sara ga na ivakaraitaki i Sister Pötter. Au na via vakatotomuria na nona vakabauta, nona yalodina, nona vosota, kei na nona mamarau. Au vakavulici ni bibi me dei na noda veiwekani kei na Kalou.”

Ena gauna ni soli cocovi, era sarava na vidio qori na le 180 era tiko ena soqo, wili kina o ira na gonevuli, na tabana ni tukutuku, na mea, na iliuliu ni Tabana ni iTovo Vakavanua kei na dairekita ena tabana ni vuli.

E vakayaloqaqataki keda na nodrau ivakaraitaki ni vakabauta kei na yaloqaqa o Justus kei Wilhelmine. Eda vakadeitaka ni o Jiova ena sega vakadua ni guilecavi ira na yalodina vua.—Iperiu 6:10.