Ena ika15 ni Tiseba 2023, e vakaicovitaki o Sister Simone Arnold-Liebster ena dua na metali, e vakatokai na Order of Merit of the Federal Republic of Germany. E soli ga na icovi qori vei ira e kilai tani na nodra veivuke vei ira na lewenivanua. A vakayacori na kena soqo e Chambéry e Varanise, qai solia na icocovi qori vei Simone e dua na mata mai vanuatani o Jenerali Thomas Pröpstl. Sa yabaki 93 o Simone. E vakavinavinakataki na nona sasaga me kua ni guilecavi na veivakalolomataki ni veiliutaki nei Itala, kei ira na sega ni tokona na veicati kei na basulawa.

Me yacova mai qo, sa vakaitavi o Simone me vosa vei ira mai na 25 na veimatanitu. E voleka ni 65,000 era dau tiko ena gauna qori, okati kina o ira na gonevuli kei na qasenivuli. Sa itabaqase o Simone, ia se vakaitavi tiko ga kina ni sema ena vidio (videoconference) me sauma nodra taro na itabagone, kei na ka e vulica ni se tiko ena nodra yabaki ni bula. Ni oti e dua na veitalanoa qori, a vola e dua na gonevuli: “Mai na talanoa i Simone, au vulica nida rawa ni vakayaloqaqataki ni dei na noda vakabauta.”

Ni solia o Jenerali Thomas Pröpstl na icocovi vei Simone, e kaya: “E veivakadrukai dina na nomu veivakayaloqaqataki ni o talanoataka na veika rarawa o sotava. O tukuna na ka dina kece e yaco, qai donu tiko ga nomu rai me baleta na veigauna se bera mai. Au dokai iko vakalevu ena vuku ni veika qori.”

Donuya na veiliutaki i Itala, o Simone kei na nona vuvale wili kina e vica vata na udolu na iVakadinadina i Jiova era vakacacani sara ga vakalevu. Ni se yabaki 12,e kau vakaukaua mai na nona vale me lai biu e Konstanz e Jamani, ena vanua e kilai me Von Wessenberg Reformatory. Qori e dua na koronivuli e cicivaka tiko na valeniveivesu me veisautaka na nona rai me tokona na matanitu e veiliutaki tiko. Na nona tudei o Simone me tawaveitovaki, e vakamadualaki, e vakalailaitaki ga na kena, vakacakacakataki vakaukaua qai vakatabui tu me vosa me voleka ni rua na yabaki. Ni nanuma lesu na gauna qori, e kaya o Simone: “E tokoni au o Jiova, au qai yalodina.”

Eda vakavinavinakataka vakalevu nona yalodina tu vakabalavu o Simone evakacaucautaka tiko ga na Tamada na Kalou o Jiova.​—⁠Maciu 5:⁠16.