22 FEPERUERI, 2021
JAMANI
Vakananuma na Palimedi Mai Jamani na Nodra Yaloqaqa na iVakadinadina i Jiova Nira Tusaqati Vei Ira na Nazi
Ena ika27 ni Janueri 2021, era vakananuma na lewe ni palimedi mai Jamani na nodra vakalolomataki na iVakadinadina i Jiova, vei ira na Nazi ena iKarua ni Valu Levu. Ena vuku ni COVID-19, era mani sarava ga na porokaramu ena internet. Era sema kina e sivia e 37,000 na lewenivanua mai Jamani, Austria, Necaladi, kei Suwitisiladi. E qai saravi vaka78,000 na katokatoni ni porokaramu qori.
E vakavinavinakataka o Muhterem Aras, na peresitedi ni palimedi ni “volatukutukutaki vinaka tu na nodra tusaqati na iVakadinadina i Jiova vei ira na Nazi, . . . ia e levu era sega ni kila na ka e yaco qori.” E kaya ni o ira na iVakadinadina i Jiova era vakalolomataki ena gauna ya, “era ivakaraitaki vinaka vei keda nikua ena gauna eda cati kina, vakaduiduitaki se caka vei keda na itovo . . . kaukaua.”
E vakamacalataka o Aras na italanoa kei Anna Denz, e dua na iVakadinadina i Jiova mai Baden-Württemberg. Rau mate na nona itubutubu ena keba ni veivakararawataki. E sega ni vinakata o Anna me tukuna na “Heil Hitler” e koronivuli. E qai vukei koya e dua na tacida, e mani dro rawa kina i Suwitisiladi. Oti rau toki sara kei watina i Merika. E kaya o Aras “e dei tu ga o Anna Denz ena vuku ni nona vakabauta.”
E vakamacalataka na daunitukutuku makawa o Dr. Hans Hesse, na kena vakatabui nodra cakacaka na iVakadinadina i Jiova e Jamani ena 1933. Qori ni oti ga e rua na vula na nodra veiliutaki na Nazi. E kaya vei ira na vakarorogo, nira sega ni vakamalumalumu na tacida nira veisoliyaka tiko ga na tikidua, ra qai vunau vakalevu.”
E tukuna tale ga o Dr. Hans Hesse na ka e sotava o Brother Gustaf Stange ni sega ni via curu ena mataivalu. Ni veilewaitaki tiko a tarogi koya na dauveibeitaki: “Vakacava ke ra vakatotomuri iko na tamata kece e vuravura?” E sauma o Brother Stange: “Ena oti vakadua na ivalu.”
E rogoci tale ga ena porokaramu qori na noda sere ni soqoni, na kena ulutaga “Ni Yaloqaqa na iVakadinadina!” O Brother Wolfram Slupina, e veiqaravi ena tabana ni iTukutuku ena valenivolavola ni tabana e Urope e Loma. E kaya ni o Brother Erich Frost, e kenadau ena ivakatagi qai bulia na imatai ni qaqa ni sere qo ena gauna a vesu tu kina ena keba ni veivakararawataki, e Sachsenhausen ena 1942. Ni vakatarogi o Brother Frost ena vicasagavulu na yabaki sa oti, e kaya ni bulia na sere qori mera vakayaloqaqataki kina na vo ni tacida era vesu tu. Nira “vakasaurarataki vakalevu e valeniveivesu.”
Rua na tacida itabagone o Mara e yabaki 13 kei Finn Kemper e yabaki 15, rau vakatarogi Sister Simone Arnold Liebster. A vakatotogani tale ga vei ira na Nazi ena gauna se gone kina. Ni sega ni via soro vei ira na Nazi, e qai vakau ina dua nodra koronivuli. Dina ni vakacacani ia e kaya ni “marau vakalevu” ni a yalodina tiko ga.
Eda marautaka ni soqo qo e ivakadinadina vei ira me baleti Jiova, ni o koya ga na dau veivuke ena gauna eda tusaqati kina vakaca.—Iperiu 13:6.