Ena Epereli 2012, e solia o Vivienne Falcone e yabaki vitu, na nodrau ivola nona itubutubu vei qasenivuli liu, rau kerea kina me kua ni vuli ena dua na siga. Ratou via tiko vakavuvale ena tolu na siga ni nodra soqo na iVakadinadina i Jiova e Mainz. Ia ratou sega ni vakadonuya na vakailesilesi e koronivuli na nodratou kerekere na vuvale i Vivienne me tiko ena porokaramu ena Vakaraubuka. Ni bibi vei rau na itubutubu i Vivienne na nona bula vakayalo, rau mani kauti koya ga ina soqo. Rau vakaraitaka tale ga ina tabana ni vuli e Jamani na ka ratou cakava na vakailesilesi e koronivuli. Ratou sega ni raica na tabana ni vuli me olodei vakalotu na soqo qori, rau mani totogi ilavo na itubutubu.

Na ka eratou cakava na tabana ni vuli ena vakavuleqa tale vei rau na itubutubu. Kena ivakaraitaki, ena lawa e Jamani, rau sa na beitaki na itubutubu ke sega ni dua na vuna vinaka e yali kina o gone e koronivuli. E rawa sara ni rau totogi ilavo se curu e valeniveivesu. Ia ena yasana kadua, rau raica na itubutubu i Vivienne ni qori e tarova nodrau galala ni sokalou kei na dodonu me rau tuberi luvedrau ena nodrau vakabauta.

Rau kere veivuke na itubutubu i Vivienne, o Stefano kei Elisa ena mataveilewai e ra me dikeva na vakatulewa ni tabana ni vuli. Erau tukuna ni siga e vakayacori kina na soqo qori e vakatabakidua ena nodratou sokalou vakavuvale, me vaqaqacotaka tale ga nodratou vakabauta. Erau kaya: “Na soqo ni veiwasewase e tiki bibi ni neimami sokalou e veiyabaki.” * E vakadonuya na nodrau kerekere na mataveilewai, e vakatulewataka ni nodra soqo na iVakadinadina i Jiova qori e okati tale ga me nodra olodei vakalotu. Ia ratou kerea na tabana ni vuli me rogoci tale, ratou kaya ni nodra soqo na iVakadinadina i Jiova e siga ga ni marau, sega ni ka vakalotu me vaka na Kirisimasi, Siganimate, se olodei tale eso.

Ena ika27 ni Julai, 2015, e tokona na Mataveilewai Levu e Hesse na vakatulewa ni mataveilewai e ra. E vakamacalataka ni vakatau sara ga ena isoqosoqo lotu yadua ibalebale ni olodei vakalotu. E vakaduiduitaka na mataveilewai na veika vakalotu kei na veika e baleta na Matanitu, ni kaya: “Ke sega sa na beca tiko na Matanitu na yavu ni vakavulewa e Jamani ni dodonu me lewa ga na lotu na kena ivakavuvuli kei na ka me baleti ira.” Na Matanitu ena “sega ni siova na lotu kei na kena ivakavuvuli.”

E vakamacalataka tale ga na mataveilewai levu ni tabaki ena nodra website na iVakadinadina i Jiova nira okata sara ga na nodra soqo me olodei vakalotu. Me baleta na kena sega ni vakadonui nodrau kerekere na itubutubu me vagalalataki e koronivuli na luvedrau, e kaya na mataveilewai ni ratou ‘sega ni kauaitaka na tabana ni vuli na dodonu ni nona sokalou na gone, vaka kina nodrau dodonu na itubutubu me rau tuberi luvedrau ena lotu kei na kena ivakavuvuli.’ Sa qai tinia na mataveilewai ni ka e cakava na tabana ni vuli “e sega ni tokona na tawaveitovaki e vinakati vua na Matanitu.”

Erau kaya na itubutubu i Vivienne ena vakatulewa qori: “Keimami sega ni dau vakawalena na vuli na iVakadinadina i Jiova, keimami vinakata mera taleitaka na vuli na luvei keimami. Keimami raica tale ga vakabibi na vuli vakalou, ni uqeti ira na gone mera taleitaka na ka vakayalo, mera veiwekani kei na Kalou, qori ena vukei ira mera dauloloma, veinanumi qai vinaka nodra itovo. Keirau vakavinavinakataka na vakatulewa ni mataveilewai.”

E kaya o Armin Pikl na nodratou loya na Falcone: “Na vakatulewa sa mai tau e vakadeitaka ni bibi na nodra soqo na iVakadinadina i Jiova, kei na nodra dodonu na itubutubu mera vakavulici luvedra ena nodra vakabauta vakalotu. Ena yaga vakalevu vei ira na gone era iVakadinadina i Jiova na nodra vagalalataki mera tiko ena soqo veiuqeti. Au nuitaka nira na dikeva tale ga qori na mataveilewai ena so tale na vanua nira rogoca na kisi va qo.”