OKOTOVA 4, 2022
JAPANI
50 na Yabaki na Tabaivola e Japani
Na yabaki qo me sa ika50 ni yabaki ni kena caka tiko na tabaivola ena valenivolavola ni tabana e Japani.
Ena 1950 ina 1960, era gugumatua ena cakacaka vakavunau na mataveitacini e Japani kei na 70 na daukaulotu. E tubu kina na iwiliwili ni dautukutuku, qai vinakati vakalevu na ivola vakaivolatabu ena vosa vakaJapani. E vakatulewataka kina na valenivolavola ni tabana e Japani me tabaka na Vale ni Vakatawa kei na Yadra!
Ena Okotova 1969, e caka na Soqo ni Veimatanitu e Tokyo, e kena usutu “Peace on Earth” (Sautu e Vuravura). E kaya kina o Brother Nathan H. Knorr ni na caka e dua na valenivolavola ni tabana vou ni tabaivola e Numazu, e volekata ga na ulunivanua o Mount Fuji.
Ena veiyabaki sa sivi ratou vakarautaka tiko na tacida e Peceli na misini ni tabaivola e Numazu, e Japani
Ena Janueri 1972, sa tekivu na tarataravaki. Ena ika15 ni Okosita 1972, era biuta kina na tacida e dua na misini levu ni tabaivola, kei na so tale na misini me caka kina na mekesini. Na imatai ni mekesini me tabaki ena vosa vakaJapani na Yadra! ni Okotova 8, 1972. E kaya e dua na tacida e veiqaravi ena tabaivola: “Na levu ni noqu marau, au luluvu niu raica na levu ni kateni era tawa tu kina na mekesini sa tabaki oti, e vakarau tale ga mera usani.”
Ena 1982, e tokitaki na valenivolavola ni tabana ina itikotiko vou e Ebina, e Japani. Na itikotiko qori e vakatolutaki na kena levu mai vei Numazu. E vakayagataki kina na misini ni tabaivola vou, e totolo tale ga. E tabaki kina na Vale ni Vakatawa, na Yadra! kei na New World Translation of the Holy Scriptures. E tabaka tale ga na ivola vakaivolatabu ena sivia e 200 na vosa.
Qo eso na tacida ratou veisautaka na iqi ena misini ni tabaivola vou e Ebina, e Japani
Me yacova mai qo, e tabaki tiko ena valenivolavola ni tabana e Japani e veivula e rauta ni 13.2 na milioni na Vale ni Vakatawa kei na Yadra! Tekivu mai na 2013, sa tabaka tale ga e sivia e 20 na milioni na iVolatabu ena sivia na 100 na vosa, qai vakau ena sivia na 50 na vanua e veiyasa i vuravura.
Ena 1972, e rauta ni 13,000 na dautukutuku e Japani. Me yacova mai na 2022, sa sivia ni 213,000 na levu ni mataveitacini. Eda marau nida raica na sala e veivuke kina na misini ni tabaivola ena cakacaka vakavunau e Japani, kei na veiyasa i vuravura.—Maciu 28:19, 20.