Ena Vakarauwai na ika13 ni Epereli, 2019, e sevutaka o Brother Stephen Lett e dua na lewe ni iLawalawa Dauvakatulewa, na New World Translation of the Holy Scriptures e vakavoutaki ena vosa vakaJapani. E sevutaki qori ena dua na soqo lavotaki e vakayacori e Noevir Stadium Kobe, mai Kobe, e Japani. Era tiko kina e le 20,868. E saravi tale ga na porokaramu qori ena walu na Vale ni Soqo Lelevu, kei na levu tale na Vale ni Soqoni e qarava na valenivolavola. Ena siga tiko ga qori kei na siga e tarava, e vakaraitaki tale ga ena Vale ni Soqoni na vidio e katoni me baleta na porokaramu qori vei ira na sega ni rawa sarava. E rauta nira le 220,491 era tiko ena soqo lavotaki qori.

Eda marautaka kei ira e sivia na le 2,950 era tiko ena vavakoso vosa vakaJapani, wasewase lalai, kei na wasewase lalai e veiyasai vuravura sa tiko nodra New World Translation e vakavoutaki. Qo e dua na iloloma talei e solia o Jiova meda vakayagataka nida vuli vakataki keda, kei na cakacaka vakavunau.—Iperiu 4:12.

A sevutaki taumada ena 1973 na New World Translation ena vosa vakaJapani e Osaka, mai Japani. A vakayacori ena yabaki qori na Soqo ni Veimatanitu kena ulutaga “Divine Victory”. E sevutaka kina o Brother Lyman Swingle, e dua na lewe ni iLawalawa Dauvakatulewa, na New World Translation of the Christian Greek Scriptures ena vosa vakaJapani. Ena ciwa na yabaki e tarava e veisoliyaki e 1,140,000 na kena ilavelave. Qori e sivia tale na iwiliwili ni dautukutuku e Japani ena gauna ya. Ena 1982, e sevutaki na ivakadewa taucoko ni New World Translation of the Holy Scriptures. E tabaki qai dabani e Japani. Qo e dua na yabaki guiguilecavi dredre vei ira na tacida e Japani ni sevutaki kina na New World Translation.

Sa vakadewataki taucoko se vakatikina na New World Translation ena 179 na vosa, wili kina e 22 na ilavelave vakavoutaki ena itabataba ni 2013.