EBINA, Japani—Na bisa ni uca e Hiroshima ena ika20 ni Okosita, 2014 e vakavuna me sisi na qele, ra mate kina e rauta ni le 74 qai toki e sivia ni 1,600. E tukuna na valenivolavola ni iVakadinadina i Jiova e Japani, ni sega ni mavoa e dua na iVakadinadina se mate, e vakacacani ga e walu na nodra vale.

Na taubi ni uca ena loma ni 3 na aua e vakacaca sara ga ena levu na vanua, e qai tuvanaka na matanitu mera vukei na lewenivanua. E tuvanaka tale ga na valenivolavola ni iVakadinadina i Jiova e dua na komiti ni vakacoko me raica nodra cakacaka na iVakadinadina era bole ena nodra vukei na vakaleqai, era veivuke ena vakasavasavataki ni itikotiko. Era veitauriligataka na kena vakasavasavataki na soso kei na nuku e tu e lomanivale. Oti qori e maroroi na iyaya e sega ni vakaleqai qai vakawainimatetaki na vanua sa vakasavasavataki mai.

E vakamacalataka na niusipepa na Yomiuri Shimbun na ka e cakava o Kayoko Nakamizo, e dua na iVakadinadina i Jiova e vakaitikotiko ena yasana o Yagi e Asaminami Ward. E dro bula mai nona vale, “e gole sara ina vo ni vale me raica se ra vakacava.” Nona cakava qori, a vukea rawa e dua, e vukei ira tale ga na kena vo mera dro mai na vanua e yaco kina na leqa.

E tukuna o Ichiki Matsunaga, e dua na mata ni iVakadinadina i Jiova e Japani: “Keimami nanumi ira na vakaleqai ena sisi ni qele. E ituvaki dredre dina, ia keimami sega ni yalolailai, keimami na saga ena neimami vinaka kece me keimami vukei ira na weka i keimami.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Japani: Ichiki Matsunaga, talv. +81 46 233 0005