7 NOVEBA, 2018
JAPANI
Era Veivuke na iVakadinadina i Jiova Vei Ira na Vakaleqai e Japani
Ena Julai 2018, e vakacacani vakalevu na ra kei Japani ena waluvu, era vakaitikotiko kina e sivia na le 47,000 na tacida. Oti ga na leqa tubukoso qori, era veivuke sara ena vakacoko e rauta ni le 4,900 na bolecakacaka, mera samaka qai vakavinakataka nodra vale na tacida kei na Vale ni Soqoni.
Era kauta laivi tiko na bolecakacaka na tikitiki ni veika e tu ena Vale ni Soqoni.
Ena nodra veidusimaki na Komiti ni Vakacoko, era samaka qai vakavinakataka e ciwa na Vale ni Soqoni e vakacacani ena waluvu. Dua tale na Vale ni Soqoni se vakavinakataki tiko. Sa vakavinakataki tale ga e 184 nodra vale na tacida, e tuvanaki tale ga me vakavinakataki e 11 na vale ena yabaki qo.
iRairai ni Vale ni Soqoni e Ehime ni oti na waluvu, kei na gauna sa vakavinakataki oti kina.
Ratou na matavuvale na Abe, ni oti na kena vakavinakataki nodratou vale.
Ratou vukei tale ga o Taro kei Keiko Abe, kei na tolu na luvedrau. Oti e tolu na siga na kena vakacacani nodratou vale, era gole sara eso na tacida ena yasayasa qori mera lai vakavinakataka nodratou vale. E okati kina na vakavinakataki ni nodratou fuloa ni vale. Era solia tale ga na tacida na loga vou kei na desi, me ratou vakayagataka na luvedrau.
Ena ika20 ni Seviteba, 2018, a tiko e Japani ena dua na ilesilesi o Geoffrey Jackson, e dua na lewe ni iLawalawa Dauvakatulewa. E mani solia e dua na vunau e veiuqeti, ena Vale ni Soqoni e Okayama. Era tiko kina e le 36,691 na tacida, wili kina eso era vakacacani ena cagilaba kei na uneune. E vakamacalataka o Brother Jackson ni na kauaitaki ira tu ga nona tamata o Jiova, ena vakacegui ira tale ga ena veika dredre kece era sotava. E vosa vakayalovinaka tale ga o Brother Jackson vei ira yadua na vakaleqai ena leqa tubukoso.
Eda vakavinavinakataka kei ira na tacida e Japani, nida lewe ni isoqosoqo i Jiova, e laurai kina na loloma, kei na nona dau veikauaitaki na Tamada vakalomalagi.—2 Korinica 1:3, 4.
Veivosaki tiko o Geoffrey Jackson, e dua na lewe ni iLawalawa Dauvakatulewa kei na tacida yalewa e Okayama. E vakaleqai tale ga na tacida qori ena waluvu a vakacaca ena ra kei Japani, ena Julai, 2018.