2 EPERELI, 2019
KAZAKHSTAN

Sarasara e Kazakhstan

SARAVA/ROGOCA

Ena ika11 ni Me ina ika10 ni Noveba, 2018, era veisureti na iVakadinadina i Jiova e Kazakhstan vei ira na tiko voleka mera sarasara ena vitu na Vale ni Soqoni e toka ena vica na siti. Era gole tale ga yani eso na vakailesilesi ni matanitu, daunitukutuku, ira na vuli vinaka, kei na lewenivanua kece mera kila na veika me baleti ira na iVakadinadina i Jiova. E sivia na le 1,500 na lewenivanua era tiko kina.

Vanua ni sarasara e: (1) Öskemen, (2) Qaraghandy, (3) Qostanay, (4) Semey, (5) Shymkent, (6) Taldyqorghan, kei (7) Taraz.

Era sureti mera sarasara ena Vale ni Soqoni ena siti o Öskemen, Qaraghandy, Qostanay, Semey, Shymkent, Taldyqorghan, kei Taraz. Era marautaka dina na itukutuku makawa me baleta noda cakacaka me tekivu ena 1892 e Kazakhstan. E laurai tale ga eso na ka sa rawati ena gauna qo, me vaka na kena sevutaki ena 2014 na New World Translation of the Holy Scriptures ena vosa vaKazakh.

O Brother Bekzat Smagulov e veiqaravi tiko ena Tabana Vakalawa kei na iTukutuku ena valenivolavola ni tabana e Kazakhstan. E kaya: “E levu era taleitaka na ka e caka qo, era kila kina se o cei dina o keda na iVakadinadina i Jiova. Era gole tale ga mai sarasara na vakailesilesi ena Tabana ni Veika Vakalotu, daunitukutuku e Kazakhstan-Öskemen, kei na daunitukutuku ni niusveva na Rudnyi Altai kei na Semei Vesti.”

Era kidavaki ira na iliuliu ni Tabana ni Veika Vakalotu kei na rua tale na vakailesilesi ni tabana qori o ira na tacida, nira sarasara e Taldyqorghan ena yasayasa vaka-Almaty. E gole tale ga yani na edita ni niusveva na Zhetysu Dialog, mani tabaka sara e dua na ulutaga me baleta nona veitarotarogi kei ira na bolecakacaka ena veivakasarasarataki.

Era solia tale ga kina na tacida e sivia na 560 na New World Translation ena vosa vaKazakh kei na vakaRusia, na vosa e vosataki vakalevu e Kazakhstan. E talei na veika vinaka e rawati ena sarasara qori, ni vakacaucautaki ga kina o Jiova. E rawa tale ga nira raica na tiko voleka na noda “cakacaka vinaka.”—Maciu 5:16.

Vosa tiko vagalu o Sister Saniya Akhmetzhanova vei ira na galu era sarasara e Qaraghandy me baleta nodra vukei vakaivolatabu.

Rau sarava tiko e rua na gone na vidio Protect Your Children ena vosa vakaRusia e Qaraghandy.

Vakamacalataka tiko o Brother Lev Gladyshev na ivolatukutuku makawa ni iVakadinadina i Jiova e Kazakhstan vei ira na vakailesilesi e Qaraghandy. E wili tale ga kina na vunivola ni palimedi o Kudaibergen Beksultanov, o Nikolay Sarsenbayev nodratou iliuliu na Tabana ni Cakacaka Vakalotu, kei Nurlan Bikenov na iliuliu ni Tabana ni Veika Vakalotu.

Vakamacalataka tiko o Sister Aisha Yakovleva e Taldyqorghan, vei rau na veiwatini na vakavakayagataki ni porokaramu na JW Library®.

Vakaraitaka tiko o Brother Aleksey Alyoshin vei ira na vulagi e Taraz, na yaca ni Kalou e laurai ena ivola kece kei na veimataqali iyaya makawa ena veigauna sa oti.

Taura toka o Brother Sergey Petkevich e Öskemen, e dua na ilavelave makawa ni Vale ni Vakatawa vakaRusia, qai vakamacalataka tiko na kedra itukutuku makawa na iVakadinadina i Jiova e Kazakhstan. E sarasara tale tiko ga na iliuliu ni mekesini na Edinstvo, o Sergey Lebedev.

Veivosaki tiko o Brother Georgiy Pismenoy (imatau) ena vanua ni sarasara e Qostanay. Era sarava tale ga e dua na vidio ni veilewai a caka ena 1982, me baleti ratou e le tolu na tacida tagane kei na dua na tacida yalewa e Qostanay donuya na gauna e vakatabui tu kina na cakacaka. Ratou totogitaki ni ratou tabaka qai veisoliyaka tiko na ivola vakaivolatabu. O Brother Pismenoy e dua vei ratou na le tolu na tacida tagane qori e totogitaki me rua veimama na yabaki e valeniveivesu, e talanoataka tale ga na veika e sotava kina.

Era kidavaki na vulagi e Shymkent ena ivakatagi era qiria toka na dauqiriqiri, wili tale ga kina na Kazakh dombra (tabaki toka ena yasana imawi kei na imatau).